Lia Thomas, notarja e parë e deklaruar si transgjinore, që fitoi një kampionat në NCAA (Shoqata Kombëtare e Atletikës Universitare), është rikthyer në qendër të debatit në SHBA.
Universiteti i Pensilvanisë, në përputhje me udhëzimet e administratës së presidentit Donald Trump, ka vendosur të fshijë tri rekordet shkollore të vendosura nga Thomas gjatë sezonit 2021-2022. Vendimi është pjesë e një marrëveshjeje me Departamentin Amerikan të Arsimit, i cili kishte hetuar rastin, duke arritur në përfundimin se pjesëmarrja e Thomas kishte cenuar të drejtat e notareve të tjera.
Në vitin 2022, Lia Thomas u bë e famshme për fitoren në Divizionin I të NCAA në kategorinë e femrave, pas një periudhe tranzicioni gjinor. Megjithatë, ajo u përjashtua nga Lojërat Olimpike të Parisit 2024 pasi humbi një betejë ligjore kundër Federatës Botërore të Notit, e cila ndalon pjesëmarrjen e atletëve që kanë kaluar pubertetin mashkullor në garat elitare për femra.
Tani, Universiteti i Pensilvanisë jo vetëm që ka fshirë emrin e saj nga rekordet në 100, 200 dhe 500 metra stil i lirë, por do t’u dërgojë edhe letra zyrtare ndjese notareve që, sipas drejtuesve të universitetit, u dëmtuan nga politikat e pranimit të asaj kohe.
Presidenti i universitetit, J. Larry Jameson, deklaroi: “Ndërsa politikat tona të pranueshmërisë në atë sezon ishin në përputhje me rregullat e NCAA, ne pranojmë se disa sportiste u dëmtuan nga këto rregulla dhe u kërkojmë ndjesë.”
Sipas marrëveshjes, universiteti tani është i detyruar të përcaktojë kategoritë “femër” dhe “mashkull” në bazë biologjike dhe të ndalojë konkurrimin e burrave në programet sportive të femrave.
Ish-notarja Riley Gaines, e cila ndau zhveshtoren me Thomas në kampionatin e NCAA në 2022, reagoi me ironi në rrjetet sociale ndaj vendimit: “Po fluturojnë derrat?” – duke falënderuar Donald Trump për mbështetjen e tij në këtë çështje.
