Një miqësi 15-vjeçare u kthye në pabesinë më të madhe. Në betime të ndërsjellta për hakmarrje.
Në një fushëbetejë ku nisën të eliminohen fillimisht “ushtarët”. E ku në ndonjë rast dikush u vra vetëm pse luajti “blofin”, që ironikisht nuk u kuptua as nga ai që konsiderohej si “mbret” i kumarit.
Pasi mësoi se përhapja e një lajmi që për kokën e tij ofroheshin 10 milionë euro, ishte thjesht një “blof”, për atë që foli ishte vonë.
Gjin Boriçi, pagoi me jetën e tij.
Ndërsa ai që e urdhëroi vrasjen, Ervis Martinaj, sot është kthyer në dilemën më të madhe për autoritetet ligjzbatuese. Është gjallë apo ka vdekur…
Ervis Martinaj, i zhdukur prej 9 gushtit të vitit 2022, nuk ka si të mos jetë në qendër të emisioneve tona, për aq kohë sa vijon të jetë në qendër të disa dosjeve hetimore, të cilat sot janë në duart e SPAK.
Madje, edhe pse nuk dihet asgjë për fatin e tij, njoftimet e Gjykatës për ta thirrur si dëshmitarë, vijojnë të shkojnë në adresë të tij.
Një kërkesë të tillë për të dëshmuar e pati edhe mbrojtja e rivalit të tij kryesor, dikur një prej miqve, Leonard Dukës. Në seancën e 18 qershorit të vitit 2025, në gjyqin kundër Dukës, i akuzuar për vrasjen e Santiago Malkos, mbrojtja kërkoi që Ervis Martinaj të thirrej si dëshmitar.
Një gjyq, që seancë pas seance po shoqërohet me tone të ashpra, me përplasje mes palëve, madje edhe me kërcënime. Ashtu si në procesin e radhës, atë të datës 24 qershor 2025, ku nëna e Santiago Malkos, nuk hezitoi t’i drejtohej Leonard Dukës, duke i thënë se nuk do ia falte kurrë vrasjen e të birit.
Që pas 2 gushtit të vitit 2024, kur Leonard Duka u ekstradua nga Belgjika, në Gjykatën e Posaçme po vazhdon procesi ndaj tij. Ai është i akuzuar si porositës dhe organizatori vrasjes së Santiago Malkos në gusht të vitit 2019. Në seancën e 24 qershorit, Duka mohoi të kishte përdorur aplikacion të koduar SKY, por SPAK paraqiti si prova të reja në proces komunikimet mes tij dhe Ervis Martinajt.
Po ashtu, ai ka mohuar përfshirjen e tij në ngjarjen ku mbeti i vrarë ish-efektivi i Policisë, Malko që njihej edhe si krahu i djathtë i Ervis Martinajt. I pyetur për një konflikt mes babait të tij dhe Santiago Malkos apo personave të tjerë e Ervis Martinajt, Leonard Duka ka mohuar një gjë tillë.
Seanca e radhës do të zhvillohet më 1 korrik 2025 ku pritet të paraqitet për të dëshmuar Muhamet Duka, babai i Leonard Dukës. Bashkë me Leonard Dukën, të pandehur janë dhe vëllai i tij, Erlis Duka, Oltion Loga, Fatmir Hyseni i njohur si Doçja, dhe Aleksandër Maxhaku. Prokuroria e Posaçme ka dyshime se Leonard dhe Erlis Duka janë organizatorët e vrasjes së Santiago Malkos për shkak të përplasjeve që kishin me Ervis Martinajn.
Ndërsa personi që u dënua me 25 vjet burg nga Gjykata e Apelit në lidhje me këtë ngjarje, Blendi Teta, pas një vendimi të Gjykatës së Lartë, do të rigjykohet me një tjetër trupë gjykuese.
Vrasja e Santiago Malkos
Megjithëse rezulton i zhdukur fizikisht, emri i tij gjatë këtyre 3 viteve u lakua më shumë se kushdo tjetër. Është thuajse e pamundur që në dosjet më të rëndësishme, që SPAK ka në dorë kohët e fundit, të mos figurojë emri i Ervis Martinajt.
Ai përmendet edhe si palë e akuzuar, edhe si palë e dëmtuar. Si njeri që dyshohet të ketë porositur atentate, por edhe si njeri që i ka shpëtuar disa atentateve. Ndoshta sot, kur nuk dihet ende asgjë për fatin e tij, shumë personazhe të tjerë të krimit, e kanë edhe më të lehtë t’ia përmendin emrin. Ta drejtojnë gishtin tek ai, ndoshta edhe për krime që mund të mos i ketë kryer apo urdhëruar. Por sado me rezerva të shihen dëshmi të tilla, e sigurt është se disa njerëz janë vrarë për shkak të tij e ndonjë edhe në vend të tij.
Duket se i tillë ishte edhe Santiago Malko. Ai u ekzekutua brenda makinës së tij, mbrëmjen e 27 gushtit të vitit 2019, në Tiranë. Në përfundim të hetimeve, pasi çoi dosjen për gjykim, Prokuroria tha se vrasja e tij kishte ndodhur për shkak të rivalitetit në lojërat e fatit mes dy grupeve kriminale. Por mes rreshtave në dosje dhe shumë dëshmive e një hetimi paralel të kryer nga Prokuroria e Vlorës, në fakt rezultoi se Malko ishte vrarë në pamundësi të eliminimit të Ervis Martinajt. Kjo, pasi disa plane për vrasjen e tij kishin dështuar.
Vrasja e Santiago Malkos ishte planifikuar nga një grup i përbërë nga 7 anëtarë, të cilët kanë qenë aktivë në terren, ndërsa dy persona të tjerë janë ata që kanë urdhëruar dhe paguar Fatmir Hysenin për të kryer ekzekutimin. Në dosjen hetimore theksohet se urdhërues të vrasjes janë vëllezërit Leonard dhe Erlis Duka. Ndërsa grupi që punonte për ta dhe mori pjesë me role të ndryshme në vrasjen e Santiago Malkos, janë: Ilir Selmani, Oltian Loga, Dritan Agaj, Aleksandër Maxhaku, Xhoni Nica, Fatmir Hyseni dhe Blendi Teta.
Gjykata e Posaçme deri tani ka dënuar 2 persona në lidhje me vrasjen. Blendi Tetën me 25 vjet burg, i cili në fakt do të rigjykohet, pas një vendimi të Gjykatës së Lartë dhe Ilir Semlanin me 28 vjet burg. I njëjti vendim është lënë në fuqi më 16 nëntor 2023 edhe nga Gjykata e Posaçme e Apelit. Ndërsa ka vendosur prishjen e vendimit për dënimin me 7 vjet burg të Elvis Gaçajt, një tjetër i akuzuar në këtë çështje, duke kthyer dosjen ndaj tij në shkallën e parë.
Ndërkohë, për personat që janë ende në kërkim, gjykimi vazhdon veçmas në mungesë. E në këtë proces, më 6 dhjetor 2023 dëshmoi i dënuari Blendi Teta, i cili përveç deklarimeve që kishte dhënë edhe më parë, dha edhe detaje të reja, kryesisht në lidhje me Ervis Martinajn.
Blendi Teta
“Nuk e njoh Santiago Malkon dhe nuk kam asnjë dijeni për ngjarjen e 27 gushtit 2019. Në atë kohë kam qenë në Shqipëri. Në datë 27 unë kam qenë për një drekë në zonën e Freskut. Në atë kohë isha menaxher i kompanisë së lotove të vëllezërve Duka, për Tiranën. Ata i njoh pasi u kam shitur atyre dhe Ervis Martinajt kompaninë time të basteve sportive. Në darkë më ka dërguar me makinë Ervis Metani, sepse makinën time e kishte marrë shoqja ime, e cila kishte shkuar në Kavajë për punë personale. Në darkë kam qenë me Leonard dhe Erlis Dukën, Fatmir Hysenin, Oltion Logun, Aleksandër Manxhakun, të gjithë ishim menaxher për qarqe të ndryshme të lojërave të fatit. Kam shkuar tek darka rreth orës 17:00 dhe kam qëndruar deri nga ora 19:30 ose 19:45 dhe më pas jam larguar. Ngaqë nuk kisha makinë i kam kërkuar Ilir Selmanit të më shoqëronte me makinën e punës që ishte “Skoda” e bardhë dhe e përdorimin për të transportuar tavolinat e lotove. Selmani më ka shoqëruar derisa të gjeja një taksi. Kemi kaluar tek Komisariati nr.4 dhe më pas kam shkuar tek spitali i Fëmijëve. Njëra taksi ishte e prishur dhe një shitëse e kioskës më tha prit 5 minuta se vjen taksia tjetër. Theksoj që celularin e kisha të fikur. Duke qëndruar aty kam dashur të shkoj në tualet. Aty në një lokal përbri Spitalit nr.5 nuk kishte tualet dhe jam futur tek spitali brenda për nevojat personale”.
Gjatë seancës, lë lidhje me disa deklarime të ndryshme, gjykata ka ndërhyre për saktësim dhe Blendi Teta ka vijuar me dëshminë.
Blendi Teta: “Nuk kam hyrë në Spitalin e Fëmijëve por tek Spitali nr.5. Më të mbërritur taksia jam nisur drejt banesës së shoqes sime, në ‘Don Bosko’. Ndërkohë familjen i kam me banim në afërsi të Liqenit të Thatë. Aktivitetin e lotove e ushtroja nga viti 2005 deri në shtator të vitit 2019. Vrasjen e kam mësuar disa ditë me vonë në gazeta. Më pas kam marrë informacion që isha në kërkim për lojërat e fatit dhe jam larguar për në Golem. Aty ku kam qëndruar deri në datë 13 shtator 2019. Dua të sqaroj se, me Ervis Martinajn dhe vëllezërit Duka kam pasur të njëjtin raport, çështje lotosh. Gjatë kohës që isha në Golem taksisti që përdorja shpesh dhe që rrinte poshtë shtëpisë së shoqes sime më ka treguar se Policia më kishte kontrolluar shtëpinë. Më shoqen nuk flisja se ajo kishte frikë ngaqë kishte shkuar Policia. Ndërsa me gruan dhe fëmijët nuk kisha folur. Kur jam kthyer në Tiranë, më datë 13, më ka arrestuar Policia, aty nuk kam dhënë deklarime të nesërmen. Më kanë dhënë të firmos disa letra dhe më thanë që janë letrat e avokatit. Unë nuk kam lidhje me këtë ngjarje, as e njoh Santiago Malkon”.
Gjatë seancës, Blendi Teta ka kërkuar që të bëjë dhe një deklarim shtesë.
Blendi Teta: “Dua të sqaroj e nderuar gjykatë, që edhe pse e dija që isha në kërkim për lotot, unë lëvizja. Në datën 8 ose 9 shtator të vitit 2019, Ervis Martinaj ka kërkuar të më takojë. Për këtë gjë ai me ka sjellë për të më takuar një nga çunat e tij me emrin Arbër. E kam takuar Martinajn po atë ditë tek ETC, në një lokal në kat të dytë. Ai ishte aty me disa nga anëtarët e grupit të tij mes tyre edhe Erigers Mihasi. Aty Martinaj më tregoi videon time kur po prisja taksinë pranë spitalit. Aty më kërcënuan dhe më kërkoi të tregoj për vëllezërit Duka. Më pas më kanë marrë dhe nën kërcënimin e armëve më kanë dërguar në një bodrum në Sauk. Aty më kanë kërcënuar duke më thënë të tregoja se kush ishte i përfshirë në vrasjen e Santiago Malkos dhe se ku rrinin vëllezërit Duka. U kam sqaruar se nuk di asgjë. Ervis Martinaj dhe grupi i tij më kërcënuan se do më vrisnin dhe do më murosnin. Më pas ata më kanë lënë të lirë. E nderuar Gjykatë dua që t’i bëj një pyetje prokurorit. A mund të më thoni kush është personi me pseudonimin ‘Tigri’ tek SKY ECC që ka dhënë 500 mijë euro për të fundosur vëllezërit Duka”?
Gjykata i kërkoi shpjegime Blendi Tetës për këto informacione dhe u shpreh se i ka mësuar duke qenë se ka 4 vite në burg për këtë çështje. Teta e ka kundërshtuar vazhdimisht dënimin e tij, duke pretenduar se dëshmia që ai ka dhënë në fazën hetimore i është marrë në mënyrë të padrejtë. Por ndërkohë, Gjykata e Posaçme e Apelit, në vendimin që la në fuqi dënimin e tij me 25 vjet burg, ka argumentuar me prova, fakte dhe dëshmi, përfshirjen e tij në grupin e strukturuar kriminal, që realizoi vrasjen e Santiago Malkos.
Në dosjen hetimore të Prokurorisë, renditen dëshmi dhe prova që hedhin dritë mbi vrasjen për hakmarrje të Santiago Malkos dhe planet e dështuara për eliminimin e Ervis Martinajt.
Siç del nga hetimet, pasi u dështoi disa herë plani për të ekzekutuar Ervis Martinajn, grupi i krijuar nga vëllezërit Leonard dhe Erlis Duka, më 27 gusht 2019 organizoi atentatin ku mbeti i vrarë njeriu u besuar i tij, Santiago Malko.
I dënuari Blendi Teta, në dëshminë e dhënë gjatë fazës së hetimeve, që ndonëse e mohon pjesërisht, Gjykata e ka konsideruar të vlefshme, ka treguar se ka qenë duke darkuar në bodrumin e një lokali, në zonën e Freskut, në afërsi të teleferikut. Lokali është në pronësi të vëllezërve Leonard dhe Elris Duka. Atë ditë kanë qëndruar në bodrumin e këtij lokali, ku ndodhet një ambient që shërben si zyrë. Sipas dëshmisë së Blendi Tetës, rreth orës 20:00, Leonardi dhe Erlisi kanë thënë: “Çohuni çuna se kemi punë.” Kanë dalë të gjithë bashkë dhe kanë hipur në dy makina. E para “Golf 5”, ngjyrë gri dhe e dyta, “Skoda”, që u gjet e fshehur në një parkim pranë drejtorisë së ish-pyjores në rrugën “Dalip Topi”.
Në vendin e parë të Skodës, është ulur Blendi Teta. Makina ka lëvizur nga Fresku të IKV, te Komisariati i Qarkullimit Rrugor, ka dalë në rrugën “Myslym Keta” dhe më pas ka marrë drejtimin te Komisariati nr.4. Aty ka mbërritur edhe Golfi. Në pak minuta, makinat kanë ecur në drejtim të kryqëzimit të Alliasit, më pas kanë vazhduar lëvizjen në rrugën ngjitur me murin e shkollës së Bashkuar në drejtim të Oxhakut. Aty janë kthyer djathtas në rrugën Kongresi i Manastirit në drejtim të SHISH. Lëvizjet e automjeteve janë fokusuar në pjesën më të madhe nga kamerat e sigurisë së bizneseve të ndryshme. Kur “Skoda” ndodhej tek spitali nr.5, njëri nga personat në makinë, i ka kërkuar shoferit të ndryshojë drejtimin e lëvizjes, duke i thënë: “ktheje se ka parkuar te kazanët”. Në rrugën “Xhanfize Keko”, ata kanë parë makinën “BMW X5”. Më pas, Blendi Teta thotë se është larguar drejt shtëpisë pasi ka kuptuar se diçka e keqe do ndodhte.
Dinamika e ngjarjes është zbardhur përmes kamerave të sigurisë. Më 27 janar, në Gjykatën e Posaçme u shfaqën për herë të parë pamjet filmike të kamerave të sigurisë që kanë fiksuar vrasjen e Santiago Malkos. Ngjarja është fiksuar nga kamera e një lavazhi ne zonën e Porcelanit, ku duket makina e atentatorëve. Nga pamjet që u shfaqën në seancën gjyqësore, duket që autorët fillimisht i kanë bërë shenjë me drita Malkos për të ndaluar.
Në momentin që ai ndalon ata e qëllojnë me breshëri kallashnikovi nga brenda makinës. Më pas makina “BMW X5”, ku ishte Saniago Malko lëviz për disa sekonda dhe përplaset me kazanët e mbeturinave.
Sipas dosjes hetimore, ekzekutor dyshohet të jetë Fatmir Hyseni nga Vlora, i shpallur në kërkim. Ndërkohë që akuzohen si organizatorë vëllezërit e klanit Duka, Leonard dhe Erlis Duka.
Santiago Malko dyshohet se u ekzekutua nga grupi rival i Ervis Martinaj, për shkak të lidhjeve të afërta me këtë të fundit. Nga përfundimi i hetimeve ka dalë se shkaku i vrasjes së tij ishte rivaliteti në biznesin e paligjshëm të lotove sportive.
Provat e këtij gjykimi në mënyrë të saktë dhe rrjedhë të qartë kronologjike ndërtojnë rrethanat e vrasjes së Santiago Malkos. Rrethana që nxjerrin në dukje piketat e planit të hartuar kriminal, nxitur nga motive të hakmarrjes, detajet e ekzekutimit të tij, duke vijuar me veprimet e secilit autor të përfshirë, identifikuar si organizatorë vëllezërit Leonard e Erlis Duka si ndihmës, i pandehuri Blendi Teta ndërsa bashkëpunëtorët e tjerë në rolet përkatëse ekzekutorë apo ndihmës.
Të dhënat e njoftuara nga dëshmi, deklarime gjatë hetimit të të pandehurit në këtë gjykim, Blendi Teta dhe të bashkëpandehurve me të në një procedim të lidhur, janë në harmoni me ato të përftuara nëpërmjet veprimit të këqyrjes, sekuestrimit, apo ekspertimit dhe që në mënyrë të padyshimtë njoftojnë faktin se vrasja e Santiago Malko, nuk ka qenë rrjedhojë e veprimeve momentale, rastësore të autorëve të saj, por ecuri e një historie të mëparshme mes tyre.
Si prova të këtij gjykimi, Apeli i Posaçëm ka konsideruar deklarimet që u janë marrë personave të dëmtuar dhe dëshmitarë në lidhje me plagosjen e 3-fishtë në Kinostudio në qershor të vitit 2018. Dëshmi që njoftojnë se gjatë ushtrimit të veprimtarisë së pa licencuar “Loto Sport”, Blendi Teta ka krijuar njohje dhe marrëdhënie biznesi me të bashkëpandehurit në një procedim të lidhur Leonard e Erlis Duka. Të njëjtat prova dëshmojnë se pjesë e të njëjtit aktivitet, së bashku me vëllezërit Duka, kanë qenë më herët ndër të tjerë Ervis Martinaj dhe viktima, Santiago Malko, derisa balancat mes tyre u prishën dhe u krijua një hendek nga rivaliteti në aktivitetin e paligjshëm “Loto Sport”.
Gjithashtu janë konsideruar si provë në këtë proces edhe aktet e ekspertimit të ngjarjes së nëntorit 2017, ku u plagos në Tiranë, Erlis Duka, si dhe transkriptet e përftuara nga bisedat mes të pandehurve të ngjarjes së Majit 2019, që u hetua nga Prokuroria e Vlorës. Edhe në këtë rast, Provat dëshmojnë se në aktivitetin e palicensuar të organizimit të lotarive sportive ishin krijuar dy grupime me interesa të kundërta, njëri prej të cilëve drejtohej nga vëllezërit Duka, ndërsa në grupin rival ishte përfshirë viktima Santiago Malko, konfliktet mes të cilëve ishin përshkallëzuar deri në ngritjen e pritave me armë, në një prej të cilave është identifikuar se ishte përfshirë aktivisht viktima.
Gjykata shprehet se vrasja e Santiago Malkos ka qenë pjesë e planit të grupit që drejtohej nga vëllezërit Duka për t’u hakmarrë ndaj grupit ku viktima bënte pjesë si dhe personalisht ndaj tij.
Vendimi i Gjykatës
“Në funksion të këtij plani të paramenduar autorët, të paktën 9 të tillë, janë strukturuar si një grup kriminal, ku qartësisht kanë ndarë detyrat dhe kanë siguruar të paktën tri armë zjarri, sikundër dëshmojnë armët e gjetura në automjetin e djegur dhe gëzhojat e sekuestruara në vendngjarje dhe tri mjete, konkretisht automjetin tip ‘Volkswagen Golf 5’ me targë AA221XB, me dokumentacion në pronësi të Ervis Metanit, automjetin tip ‘Skoda Roomster’ me targa AA275YD, me dokumentacion në emër të Kiara Meçes dhe automjetin tip ‘Mercedes Benz CLK’ me targa AA434LX, i vjedhur kohë më parë në Fushë-Milot (Kurbin), nga i cili edhe u qëllua me pasojë fatale drejt viktimës”.
Në vendimin e saj, Gjykata e Posaçme e Apelit shprehet se, është provuar që pjesë e këtij plani të paramenduar kriminal është bërë edhe Blendi Teta, i cili i dakordësuar me organizatorët, ka marrë përsipër kontributin e sigurimit të informacioneve dhe mbikëqyrjes së lëvizjeve të viktimës Santiago Malko, të paktën një javë para ngjarjes dhe ditën e ndodhjes së saj. Dëshmia e nënës së Santiago Malkos, Bukurije Malko, se pikërisht ditën e ngjarjes, djali i saj kishte shtruar në spitalin Pediatrik fëmijën e tij të sëmurë, vend ku në orët e vona të mbrëmjes dhe ndodhi ngjarja, tregon se autorët e ngjarjes, monitoronin në mënyrë të sigurt lëvizjet e viktimës.
Nëna e Santiago Malkos ka treguar në dëshminë e saj në gjyq edhe episodin kur ka fiksuar një person, që ajo e identifikoi si Blendi Teta, që i ka ndjekur kur ishte bashkë me të birin.
Bukurije Malko: “As një javë më parë se të ndodhë ngjarja, do merrnim materiale për marketin dhe ky person (duke ju referuar të pandehurit) na ka ndjekur me makinë, tek rruga, rrethrrotullimi tek “Shqiponja”. Ky (drejtohet nga i pandehuri) ka zbritur nga makina dhe afër derës, i them unë djalit kur u futëm brenda në makinë, se ky i shëndoshi rri mbrapa dhe djali më tha “Po ik o ma se kështu fiksohesh ti”. Ky person mua mu fiksua, se na ka ndjekur deri tek marketi. Sa ikëm nga aty erdhi mbrapa nesh. Vetëm se e kam me fytyrë se na ka ndjekur nga mbrapa. Emrin e tij e mësona në televizion”.
Gjykata argumenton se, ndryshe nga ç’pretendohet nga mbrojtja e Blendi Tetës, darka e organizuar në zonën e Freskut, në restorantin “La famiglia”, vend familjar për vëllezërit Duka, nuk ishte rastësore dhe as me qëllimin e thjeshtë të darkimit. Por zhvillohej me qëllimin e takimit të anëtarëve të grupimit për të saktësuar detajet e fundit, në pritje të sulmit përfundimtar, për të cilin provat dëshmojnë se ishte llogaritur me saktësi dhe është ekzekutuar me përpikmëri të lartë.
Dosja e Prokurorisë: “Autorët, të ndarë në tre automjete, një prej të cilëve ai tip ‘Skoda Roomster’ me targa AA275YD, ndoqën lëvizjet e viktimës, parkuan pranë automjetit të tij ‘BMW X5’ me targë AA153OO, derisa në kohën mes orës 22 :18 – 22 :21, kur sapo ai ka dalë nga Spitali Pediatrik dhe është futur në makinën e tij për t’u larguar, autorët ekzekutorë nga automjeti ‘Mercedez Benz CLK’ që i është afruar paralelisht shumë afër, kanë hapur zjarr në drejtim të tij duke i shkaktuar vdekjen e menjëhershme”.
Vendimi i Gjykatës: “Ky kolegj i Gjykatës së Apelit, duke i qëndruar të njëjtës linjë si Gjykata e Shkallës së Parë, arsyeton se të çmuara në tërësinë e tyre, provat, në mënyrë të padiskutueshme kanë fuqinë të provojnë ekzistencën e vrasjes së paramenduar të Santiago Malkos, më datë 27 gusht 2019, nga një grup i organizuar personash në përbërje të të cilit ishte, përveç të tjerëve dhe i pandehuri i këtij gjykimi Blendi Teta. Nga ana tjetër, këto prova kanë fuqinë provuese të vërtetimit që, fakti penalisht i dënueshëm i vrasjes së paramenduar të kryer për hakmarrje ka ndodhur sipas një plani të paraparë kriminal, për të cilin qëllimisht është krijuar grupi i strukturuar kriminal, për të privuar nga jeta Santiago Malkon, fakt i njoftuar nga provat e shqyrtuara hollësisht si nga ky kolegj, ashtu dhe ai i gjykatës së shkallës së parë të gjykimit”.
Leonard Duka, u arrestua më 14 shkurt 2023 në Belgjikë dhe u ekstradua në Shqipëri më 2 gusht të vitit 2024. I konsideruar si armiku më i ashpër i Ervis Martinajt, i zhdukur që prej datës 9 gusht të vitit 2022, Duka ishte i shpallur në kërkim ndërkombëtar për vrasje. Të gjithë e dinin në Dubai, vend ku kanë gjetur strehë shumë të kërkuar të tjerë. Por Leonard Duka u prangos në një provincë të Brukselit, nga ku edhe u ekstradua. Ai aktualisht po gjykohet për vrasjen e ish-policit Santiago Malko, një nga njerëzit më të besuar të Ervis Martinajt.
Planet për vrasje
Kur u zhduk afro 3 vite më parë, Ervis Martinaj ishte shpallur në kërkim nga SPAK si i dyshuar për urdhërimin e një vrasje e sigurimin e kushteve për kryerjen e saj. I kërkonte Nuredin Dumanit, eliminimin e Endrit Dokles.
Kjo ishte arsyeja që u në tavolinë u hodhën tri karta. E para ishte ajo e inskenimit, meqenëse ishte shpallur në kërkim; e dyta ajo e pengmarrjes; e treta e vrasjes. Të dy këto të fundit lidhen me rivalitetin e armiqësitë që kishte krijuar.
Por ende, as sot, nuk dihet asgjë me siguri. Edhe pse i zhdukur fizikisht, emri i tij gjatë kësaj kohe është lakuar më shumë se kushdo tjetër. Në dosjet më të rëndësishme që SPAK ka në dorë kohët e fundit, renditet emri i Ervis Martinajt. Ashtu sikurse rezultoi në dosjet “Metamorfoza”, ku doli në skenë një tjetër vrasje që u krye në emër të tij e një tjetër që do realizohej nga ai, por dështoi. Në këtë dosje, ndaj tij është ngritur akuza e vrasjes me paramendim, lidhur me ekzekutimin e Gjin Boriçit, më datë 9 gusht 2020 në Shkodër; sigurim i kushteve dhe mjeteve për të kryer vrasje, lidhur me tentativën për të vrarë Kleant Musabelliun, si dhe armëmbajtje pa leje. Vepra penale këto të kryera në bashkëpunim, në kuadër të grupit të strukturuar kriminal.
Teksa dëshmi nga personazhe të ndryshëm, mund të shihen me dyshim, për komunikimet e aplikacionit SKY duket se nuk ka vend për të dyshuar. Emri i Ervis Martinajt del edhe aty. Ai kishte në përdorim PIN-in NP8LS4. Deri tani SPAK ka zbardhur një pjesë të mesazheve që janë nisur drejt tij e disa të nisura nga vetë ai.
Dosja e SPAK, e majit të vitit 2024, e njohur edhe si “Metamorfoza 2”, që zbuloi lidhjet e 7 grupeve kriminale më të rrezikshme në Shqipëri, zbuloi aleancat e krimit. Bashkëpunimin e drejtuesve të këtyre grupeve për të vrarë armiqtë e njëri-tjetrit, për miqësi por edhe për para. Për shuma marramendëse që shkojnë deri në miliona euro.
Episodi i tetëmbëdhjetë në dosje, flet për sigurimin e kushteve për të vrarë Ervis Martinajn. Një plan që është porositur dhe financuar nga Leonard Duka dhe ekzekutorë janë vëllai i tij, Erlis Duka dhe Fatmir Hyseni i njohur si Doçja. Ndërsa në rolin e vëzhguesve, transportimit të armëve dhe lokaliuzuesit të Ervis Martinajt e lidhjeve të tij, janë Drianto Bardhi dhe Altin Gega. Referuar bisedave të realizuara në SKY, që ka administruar Prokuroria e Posaçme, del në pah fakti që Leonard Duka dhe Ervis Martinaj kanë pasur shoqëri prej 15 vitesh dhe kanë bashkëpunuar me qëllim zhvillimin e biznesit në fushën e lojërave të fatit dhe administrimin e bizneseve të tjera si hotele, bare, lokale në zonën e ish-Bllokut dhe zona të tjera të Tiranës. Gjithashtu ata kanë bashkëpunuar edhe me qëllim zhvillimin e aktivitetit të paligjshëm të trafikut të narkotikëve.
Konflikti mes Dukës dhe Martinajt ka nisur për shkak të një debati që Leonardi ka pasur me Santiago Malkon, i vrarë më 27 gusht 2019, i cili sipas të dhënave të SPAK ka dhunuar babanë e vëllezërve Duka. Malko ka qenë lidhje e ngushtë e Ervis Martinajt e Erigers Mihasit. Pas vrasjes së tij, Martinaj bëri përgjegjës për krimin Leonard Dukën dhe lidhjet e tij. Kjo ishte edhe arsyeja pse Ervis Martinaj u angazhua më pas për të vrarë Leonard e Erlis Dukën, Fatmir Hysenin, Altin Gegën dhe Elvis Gaçajn, si hakmarrje për ekzekutimin e Satiago Malkos.
Megjithëse, në një bisedë që kanë realizuar bashkë Leonard Duka dhe Ervis Martinaj, ky i fundit thotë se në fakt nuk ka dashur t’i vrasë për Malkon, por sepse kishte mësuar se donin ta vrisnin vetë atë. Gjatë bisedës ata i tregojnë njëri-tjetrit që kanë marrë informacione në lidhje me persona që janë angazhuar për të kryer vrasjen e njëri-tjetrit nga të dy palët.
Ervis Martinaj: Ai (Santiago Malko) gaboi më babën tënd. Unë babën tënd me e pa në rrugë vetëm e respektoj dhe me të pa ty me gra ose fëmijë e Erlisin, nuk të gjuj.
Leonard Duka: Ai (Santiago Malko) nuk bënte asnjë lëvizje pa dijeninë tënde. Ne kemi pasë shoqëri prej 15 vitesh bashkë.
Ervis Martinaj: Një natë para ishit vëllezër dhe të thashë bëji muhabetet mirë se ai është skizofren dhe ai gaboi me babanë tënd.
Leonard Duka: Unë vetëm prej babës jam mërzit se ç’a ka pasë me atë tjetrin, s’kishim arrit deri këtu.
Ervis Martina: Ti nuk më vret dot mua me gabelt e Vlorës o Nard, ti më vret vetëm kur të jesh me të drejtën tënde. Të thashë leje atë, mos e vrit (i referohet Santiago Malkos). E shave, ishin llafe të vërteta, nuk të thashë gjë. Llogaritë të thashë ulena dhe i bëjmë kur të duash.
Leonard Duka: Çfarë do të bëje për babën tënd?
Ervis Martinaj: Do ta kisha vrarë. Ai pretendonte që ti kishe paguar 500 mijë euro për ta vrarë dhe i thashë kërkoji falje për babën, sqarohuni pastaj vrituni. Unë sherrin ia kam parë atij se më ka fut në sherr me gjithë Shqipërinë ai qelbanik. Pas grabitjes së pleqve në Tepelenë, e kam marrë vesh pas 6 muajsh, për gjuajtjen e Rinos iu kam lutur dhe i kam thënë na 10 mijë euro dhe mos bëj zhurmë. Iu lute edhe ti, por ti ke qenë tapë nga Trejsi, nuk mban mend.
Leonard Duka: Unë prej teje e kam njohur dhe nuk i takonte për respektin tënd me bo ato veprime, gjithsesi ç’a ka ik nuk vjen më.
Ervis Martinaj: Unë nga sot nuk kam punë as me ty as me Altin Gegën. Një shkodran e pastrova se hante … (i referohet Gjin Ndojit) dhe atë vlonjatin (Fatmir Hysenin) do e vras sepse ka dasht me më vra mua, jo Santin. Ose do t’i vras, ose do të kalben në burg. Ndërsa me ty nuk merrem nga ky moment. Unë e kam inatin me ty që ke dasht të më vrasësh mua, jo për Santin, sepse unë deri sa ëstë vra ai nuk e kam çu në mendje të të vras. Dhe mbasi është vra Santi kam lexuar dosjen dhe kam mësuar që t’i ke dasht me më vra dhe atëherë kam dashur të të vras.
Nga ana tjetër, në një moment Leonard Duka dhe Ervis Martinaj flasin edhe ndarjen e llogarive që kanë pasur bashkë dhe pasi do të likujdoheshin me paratë, nuk do të kishin më punë bashkë. Duka i nis foto të dy faqeve ku shënoheshin llogaritë e përbashkëta që ata kishin pasur me njëri-tjetrin, por në fund prapë nuk bien dakord. Në një moment, Martinaj i tregon për motivin e vrasjes së Gjin Ndojt, ngjarje e cila del në dosjen e parë “Metamorfoza”, e realizuar nga grupi Bajri. Madje edhe pas vrasjes së tij, Martinaj dhe Arben Ndoka, vijojnë të mbajnë pas vetes, vëllain e tij, Jozi Kraja, i cili nga ana tjetër nuk e dinte se kush e ka urdhëruar vrasjen e të vëllait dhe punonte për ta.
Ervis Martinaj: Gjin Ndoj u vra sepse kishte filluar t’ju thoshte njerëzve sqë do të bëhem me Nardin se ai jep 10 milionë euro për Visin dhe kur e kapëm na tregoi që kishte gënjyer dhe e vramë kot budallain.
Leonard Duka: Unë nëse rregullohem me ty do t’i spostoj të gjithë dhe do të bëjmë be që të dy, ti dhe unë.
Ervis Martinaj: Unë nuk kam pasë punë me njeri tjetër, vetëm me ty e kam pasë inatiun se ke dashur të më vrasësh në pabesi. Edhe atë Doçen e kam inat se ai të ka fryrë ty për të më vrarë.
Leonard Duka: Unë e di që i kam shokë dhe shokët nuk i shaj. S’më ka lidh leku me to, kam punu sikur kam punu me ty.
Megjithëse bisedat e zhvilluar në platformën SKY mes anëtarëve të grupeve kriminale, konsiderohen një provë në duart e SPAK, disa prej të akuzuarve vijojnë ti kundërshtojnë.
Edhe Leonard Duka, i cili po gjykohet për vrasjen e Santiago Malkos, mohon të ketë qenë përdorues i SKY, apo të ketë zhvilluar biseda me Ervis Martinajn në këtë platformë. Megjithatë thotë se ka pasur kontakte me të dhe e ka takuar
Në seancën e datës 24 tetor 2024, Duka mohoi përfshirjen e tij në ngjarjen e ndodhur në gusht të 2019. Ai deklaroi se mësoi për vdekjen e Malkos, pasi u shoqërua nga Policia.
Prokurori: Çfarë keni bërë në 27 gusht 2019?
Leonard Duka: Mesa mbaj mend ditën e ngjarjes jam shoqëruar nga policia, më kanë marr shenjat e gishtave, pastaj më lanë të lirë. Aty kam mësuar për ngjarjen. Kam qenë në lokalin tim deri në orën 10, pasi mbylla lokalin, po ikja për në shtëpi më ndaloi policia. Si çdo ditë me punët, kemi ngrënë një drekë me stafin dhe pastaj kam vazhduar rrjedhën. Kam qenë me vëllain tim, Erlis Duka, më ka bërë shenjë policia dhe shkuam në polici. Policia bëri punën e vetë në mënyrën më njerëzore, asnjë kundërshtim me mënyrën si më shoqëruan, më kanë nxjerrë ditën tjetër. Unë se dija kush kishte vdekur, aty e mora vesh. Më pyetën, u thashë që nuk kam lidhje me ngjarjen, kam treguar për njohjen e vjetër miqësinë me të ndjerin. Pasi rregulluan letrat në mënyrë korruptive, më shpallën në kërkim. Mund të më thoni ju prokuror pse jam këtu, se unë nuk e di.
Prokurori: Në çfarë rrethanash jeni njohur?
Leonard Duka: Nga shoqëria e përbashkët që kemi, jemi njohur, se Shqipëria e vogël është. Nuk kam pasur shoqëri të afërt me të. Jemi nga një zonë këtu në Tiranë. Unë jam marrë me loto, kisha “Max Loto” në pronësi. E kam pasë të shtrirë në të gjithë Shqipërinë. Administratorët e pikave që kisha nëpër Shqipëri ishim për darkë. Kur u ngritëm ikëm të gjithë në të njëjtën kohë dhe nuk e di me çfarë kanë ardhur ata aty. Unë kam qenë me “Audi”-n. Nuk mbaj mend makina e tjera.
Prokurori: Një “Volkswagen”, golf 5 a e mban mend?
Leonard Duka: Unë nuk e mbaj mend, di të flas për makinat e mia, nuk e di çfarë përdorte stafi. Nuk e di me çfarë është marrë viktima. Kisha shumë vite, të paktën 3 pa e parë fare. Shoku i përbashkët që na ka ulur është Ervis Martinaj. Këtë të fundit e kam pas shok prej 15 vitesh. Më pas jemi ndarë dhe kam gëzuar respekt për të, secili mori drejtimin e vet. Me baste jemi marrë ne, ai ka pasur shumë biznese, po ajo që kemi bërë bashkë është se jemi marrë me bastet. I kemi pasur të përbashkëta, pastaj u ndamë. Kemi nisur që në 2006. Nuk kemi pasur asnjë marrëdhënie borxhi mes meje dhe Ervis Martinajt pasi jemi ndarë. Edhe pasi ndamë bizneset, kemi qëndruar ndonjëherë në shoqëri të përbashkëta, jemi rastit nëpër lokale. Kemi folur ndonjëherë në telefon.
Ndërsa në seancën e 24 qershorit 2025, Leonard Duka ka dëshmuar sërish dhe u është përgjigjur pyetjeve të avokates.
Avokatja: A keni pasur Sky Ecc?
Leonard Duka: Jo.
Avokatja: Keni pasur kontakte me persona që kanë pasur Sky?
Leonard Duka: Jo s’kam pasur asnjë kontakt.
Prokurori: Me Ervis Martinaj keni komunikuar keni pasur kontakte?
Leonard Duka: Po e kam takuar.
Prokurori: Po komunikime të tjera?
Leonard Duka: Jo.
Prokurori: Po babai juaj ka pasur ndonjë problem e keni ndarë me njeri?
Leonard Duka: Babai im s’ka pasur asnjë problem.
E me gjithë kundërshtimet e tij, SPAK solli në seancë prova të reja, biseda të zhvilluara në SKY, ku janë zbardhur komunikimet mes Leonard Dukës dhe Ervis Martinaj. E në një moment gjatë seancës tensionet janë shtuar, kur nëna e Santiago Malkos, e pranishme në seancë i është drejtuar të pandehurit:
Bukurije Maklo: S’ta fal gjakun e djalit kurrë, do të vras. Më fute djalin në dhe.
Pas tensioneve, Gjykata e ka nxjerrë jashtë Bukurije Malkon.
Përballjet në gjykatë për këtë dosje do të vijojnë edhe në seancat në vazhdim. E ndoshta edhe tensionet, siç ka ndodhur edhe më parë. Por me gjasë ajo përballje që po kërkohet, ndoshta thjeshtë formalisht, nuk ka për të ndodhur asnjëherë.
Që në krye të herës, mbrojtja ka kërkuar që të thirret si dëshmitar, Ervis Martinaj. Një njeri që për të paktën 3 vjet po kërkohet edhe si dëshmitar, edhe si i akuzuar edhe si viktimë.
Madje në disa ngjarje që ndodhën pas 9 gushtit të vitit 2022, kur ai u deklarua i zhdukur, përplasjet e përgjakshme vazhduan. Disa nga ata që konsideroheshin “armiqtë” e tij u ekzekutuan. Se nga kush, kjo mbetet ende mister. Ashtu siç mbetet edhe vetë fati i tij.
/Emisioni “Gjërat Tona”
