Flamur Gega, 29 vjeç, është arrestuar në Londër pas një urdhër-ndalimi ndërkombëtar të lëshuar nga Interpol Tirana, për llogari të drejtësisë shqiptare. Ai akuzohet se ka kërcënuar një vajzë me publikimin e fotove dhe pamjeve intime, në mënyrë që ta frikësonte dhe intimidohej.
Sipas Top Channel, ngjarja ka ndodhur më 20 dhjetor 2020, dhe që atëherë autoritetet shqiptare kishin shpallur Gegën në kërkim ndërkombëtar.
Ai është paraqitur të enjten përpara gjykatës së ekstradimeve Westminster Magistrates’ Court në Londër, ku u vendos që të qëndrojë në paraburgim në burgun HMP Wandsworth, deri në seancën e radhës për procesin e ekstradimit, e planifikuar për 3 korrik 2025.
