Në redaksinë e emisionit “Stop” në Tv Klan janë ankuar banorët e njësisë 14, Kashar, pasi prej 25 ditësh sipas tyre, puseta e ujërave të bardha përzihet me ujerat e zeza dhe i gjithë vendi mban erë të keqe, duke u kthyer në vatër infeksionesh.
“Tubi që na furnizon ne, 600 metra është shtatë herë i çarë. Tani na rastisi ne për të shtatën, këtu në pikën e lidhjes së sahatit të përbashkët dhe ku është puseta e ujërave të bardha, aty është çarë tubi që sjell ujë, aty është edhe gropa e ujërave të zeza dhe ato interferojnë me njëra-tjetrën. Kur vjen uji dhe puseta mbushet plot me ujë, kur ikën uji dhe boshatiset, pompa thith ujërat e zeza dhe na i sjell përsëri në shtëpi. Më datën 20 maj doli sheshit. Kam 12 vjet që nuk e pi ujin fare, e ble”, tha një banor.
“Në pamje të parë uji duket normal, por po ta marrësh dhe ta analizosh nuk e di se çfarë mund të ketë brenda”, tha një banore.
Vetë banorët i kanë bërë dy herë shkresë zyrtare UKT-së, por nuk kanë marrë asnjë përgjigje. Gazetarja e “Stop”njofton inxhinierin e UKT-së, Ervis Dema, i cili pasi njihet me rastin, sjell punëtoret e UKT-së, duke zgjidhur problemin në kohë rekord./tvklan.
