Ballkani po përgatitet për një valë ekstreme të të nxehtit, që ka shkaktuar alarm në vendet e rajonit, ndërsa autoritetet shëndetësore u kanë bërë thirrje qytetarëve të qëndrojnë në ambiente të freskëta dhe të konsumojnë sa më shumë lëngje për të shmangur dehidratimin.
Meteorologët në Serbi deklaruan të enjten se vendi ka shënuar ditën më të nxehtë që nga fillimi i matjeve në shekullin e 19-të, duke parashikuar temperatura edhe më të larta në ditët në vijim. Autoritetet u kanë rekomanduar qytetarëve të qëndrojnë në zona me hije ose në ambiente të kondicionuara, të shmangin ekspozimin ndaj diellit nga ora 11:00 deri në 17:00, si dhe kanë paralajmëruar për rrezikun që një thatësirë e zgjatur mund të paraqesë për të korrat.
Sipas parashikimeve, temperaturat në të gjithë Ballkanin pritet të arrijnë deri në 40°C javën e ardhshme.
Në Mal të Zi, shumë turistë janë larguar nga bregdeti përvëlues i Adriatikut në jug dhe janë drejtuar drejt zonës më të freskët malore të Durmitorit në veri, ku temperaturat në rreth 1,500 metra mbi nivelin e detit janë ndjeshëm më të ulëta.
Në Kroaci, që ditët e fundit është përballur me zjarre përgjatë bregdetit të Adriatikut, shumë qytetarë janë drejtuar drejt liqenit Bundek, pranë kryeqytetit Zagreb, për t’u freskuar.
Ndërkohë, edhe në Maqedoninë e Veriut, qytetarët po kërkojnë strehë nga i nxehti në zonat përreth liqenit të Ohrit.
