Pavarësisht fitores së arritur, Luis Enrique nuk i ka kursyer kritikat për gjendjen e fushave në Kupën e Botës për Klube.
Trajneri spanjoll i PSG ka shprehur hapur pakënaqësinë e tij në mikrofonët e “L’Équipe”, duke theksuar se cilësia e fushave në SHBA po e dëmton lojën e skuadrës së tij:
“Topi kërcen si një lepur. Më parë ishte bar sintetik, tani është bar natyral, por duhet ta ujisin. E bënë gjatë pushimit të pjesës së parë, por 10 minuta më vonë fusha ishte sërish e thatë. Për mënyrën tonë të lojës ky është problem. Nuk dua të justifikohem, po e them pas një fitoreje, por mbetet shqetësim real. Nuk po arrijmë të luajmë në nivelin që duam”.
Luis Enrique e zgjeroi më tej kritikën e tij, duke theksuar se vështirësitë nuk kufizohen vetëm te fushat, në të cilat luhet Botërori i Klubeve: “Mendoj se FIFA duhet ta marrë seriozisht këtë çështje. Nuk bëhet fjalë vetëm për fushat e ndeshjeve, por edhe për fushat stërvitore, nëse duam që ky të jetë një nga kompeticionet më prestigjiozë në botë”.
Në fund, trajneri spanjoll përdori një krahasim mjaft të fortë për ta përshkruar situatën: “Është njësoj sikur një fushë e NBA-së të ishte plot me gropa. E papranueshme në këto nivele”.
