Gjykata e Apelit ka lënë në fuqi vendimin e shkallës së parë të Gjykatës së Lezhës, duke e dënuar përfundimisht me burgim të përjetshëm 33-vjeçarin Kristjan Cenaj. Ai është shpallur fajtor për vrasjen e 16-vjeçarit Mariglen Gjonaj për t’i grabitur orën “ROLEX” dhe varësen e floririt, ngjarje kjo e ndodhur në Mamurras në Maj të vitit 2015.
Prokuroria e Lezhës kishte kërkuar edhe “aplikimin e periudhës se sigurisë” që nënkupton se “edhe pasi të bënte 35 vite burg, Kristjan Cenajt të mos i jepej mundësia për lirim për kohë me kusht”, por kjo masë nuk është pranuar nga gjykata.
Familjarët e viktimave janë shprehur të pakënaqur nga vendimi, pasi pretendojnë se në krim janë të përfshirë dhe persona të tjerë. Sipas tyre, autori ka bashkëpunuar me persona të tjerë që nuk janë hetuar dhe se dosja penale është e cunguar.
Mariglen Gjonaj u zhduk në rrethana misterieze në vitin 2015. Eshtrat e tij u zbuluan rastësisht në 3 Prill 2022, kur një fshatar i zonës së Fushë-Kuqes, i vuri zjarrin një ferre pranë pronës së tij.
Me djegien e ferrës, dolën në dritë dhe mbetjet kockore të një njeriu. Pas analizimit të ADN-së, rezultoi se eshtrat i përkisnin pikërisht 16-vjeçarit të zhdukur në Maj 2015 Mariglen Gjonaj.
Ekzaminimet mjeko ligjore të kryera pas gjetjes se trupit të viktimës në prill të vitit 2022 identifikuan nje dëmtim në kokë që dyshohet të ketë ardhur si pasojë e goditjes me sende të forta qe i kane shkaktuar atij edhe vdekjen.
Autori Kristjan Cenaj, mendohet se ka vepruar i vetëm për grabitjen dhe vrasjen e adoleshentit, konkluzion qe është arritur nga prokuroria e cila kreu disa hetimet për ngjarjen.
