Kampionati Europian i 21-vjeçarëve i cili po zhvillohet në Sllovaki, mes shumë talenteve ka zbuluar edhe Nelson Weiper.
Sulmuesi i Gjermanisë U21 të drejtuar nga Antonio Di Salvo ka shfrytëzuar në maksimum shansin e dhënë nga komisari teknik pasi në ndeshjen e tretë të grupit ku u aktivizua përballlë Anglisë arriti që të shënonte një gol të bukur.
Talenti 20-vjeçar, në një prononcim të dhënë së fundmi për “Bild”, ka treguar se është kontaktuar nga drejtuesit e FSHF-së, për t’iu bashkuar kombëtares kuqezi, pasi nëna e tij është shqiptare.
Sulmuesi ndër të tjera pohon, se e shikon Shqipërinë si një alternativë, në qoftë gjerat nuk funksionojnë, për t’u bërë pjesë e Kombëtares A të Gjermanisë.
Ai aktualisht është pjesë e Mainz në Bundesligë, teksa mban edhe rekordin e golashënuesit më të ri në historinë e klubit gjerman.
“Qëllimi im është të bëhem një titullar i rregullt, nëse Burkardt largohet nga Mainz. Kam folur me klubin për këtë, dhe ata e shohin kështu, dhe unë do të jap gjithçka nga vetja.
Te Shqipëria më kanë kontaktuar dhe tashmë më duan për ekipin kombëtar të të rriturve. Është vërtet një burim krenarie kur ekipi i të rriturve të një vendi të dëshiron.
Dua të tregoj talentin tim në ekipin gjerman U21 dhe të luaj për Gjermaninë sa më gjatë të jetë e mundur.
Nëse gjërat nuk funksionojnë për Gjermaninë në një moment, Shqipërinë e shoh si një mundësi shumë të mirë”, deklaroi ndër të tjera Nelson Weiper.
