Adrion Pajaziti, mesfushor shqiptar 22-vjeçar, është vetëm një hap larg transferimit tek Hajduku i Splitit.
Pas një sezoni mbresëlënës në huazim te Gorica, ku veçanërisht në fazën e dytë të kampionatit spikati si një nga lojtarët më të mirë të skuadrës pas rikuperimit nga një dëmtim i rëndë, Pajaziti pritet të nënshkruajë me gjigantin kroat.
Mesfushori, i lindur në Londër, e nisi karrierën e tij në akademinë e Fulhamit, klub me të cilin ka qenë i lidhur deri tani. Me kontratën që i skadon këtë verë, Pajaziti do t’i bashkohet Hajdukut si lojtar i lirë, pa kosto transferimi.
Pajaziti e bëri debutimin e tij me Kombëtaren Shqiptare këtë mars, në një përballje të veçantë kundër Anglisë në qytetin e tij të lindjes, një tjetër dëshmi e rritjes dhe potencialit të tij ndërkombëtar.
Për shërbimet e tij ishin të interesuara disa klube, përfshirë Rijekën, Olimpija Ljubljanën dhe vetë Hajdukun. Por siç raportojnë mediat kroate, destinacioni i ardhshëm i Pajazitit do të jetë pikërisht Hajdiku, ku pritet të nisë një kapitull të ri në karrierën e tij.
Ky transferim shihet si një goditje e rëndësishme për Hajdukun, që përforcon mesfushën me një lojtar të ri, të talentuar dhe me ambicie për t’u afirmuar në elitën e futbollit ballkanik.
