Pavarësisht investimit të mbi 50 milionë dollarëve në marketing, FIFA po vuan për të mbushur stadiumet për Kupën e Botës për Klube që po zhvillohet aktualisht në Shtetet e Bashkuara.
Sipas një hetimi nga The Athletic, organi që qeveris futbollin botëror ka nisur një fushatë intensive promovuese, veçanërisht në rrjetet sociale, për ta transformuar turneun në një sukses global. Por rezultatet, të paktën për momentin, nuk janë ato që shpresoheshin.
Këmbana e parë e alarmit ra të hënën në ndeshjen mes Chelsea dhe Los Angeles FC, e luajtur në Atlanta para vetëm 22,000 spektatorëve në një stadium me 71,000 vende.
As Inter Miami i Lionel Messit nuk arriti të shesë të gjitha biletat e ndeshjes hapëse, pavarësisht uljes së çmimeve: nga 349 dollarë në vetëm 20 dollarë disa ditë para ndeshjes. Pjesëmarrja ishte më e lartë në vende të tjera, por shifrat e pritura ende nuk janë arritur.
FIFA është mbështetur shumë te influencuesit, tabelat e reklamave në autostrada dhe madje edhe te gazetarët e bejsbollit të ngarkuar me “shpjegimin e futbollit” për amerikanët.
E megjithatë, interesi për këtë kompeticion nuk është rritur kurrë, me mijëra bileta të pashitura: tifozët anglezë, italianë dhe spanjollë nuk janë as midis dhjetë tregjeve kryesore për blerjen e biletave, një dëshmi se sa e ndërlikuar është të organizosh një ngjarje si kjo larg Europës.
Ata që po shpëtojnë fytyrën janë tifozët e Amerikës së Jugut dhe Afrikës së Veriut, të cilët janë të pranishëm në numër të madh dhe shumë më të përfshirë.
