Gjykata e Posaçme ka lënë në fuqi masën e arrestit në burg caktuar në mungesë për Dashnor Dumanin, vëllain e bashkëpunëtorit të drejtësisë, Nuredin Dumani, ndërsa ndryshoi atë nga ‘arrest në burg’ në ‘arrest shtëpie’ për Armis Stafën, pjesë e organizatës kriminale të Çopjave.
Asnjëri prej të akuzuarve nuk foli në gjykatë, por u përfaqësuan nga avokatët Ferdinand Ndoja dhe Gurali Braimllari.
Dashnor Dumani dyshohet nga SPAK për përfshirje në masakrën e Bradasheshit, ku mbetën të vrarë tre persona, si dhe për supergrabitjen në pistën e aeroportit të Rinasit.
Ndërkaq, Armis Stafa dyshohet për pastrim parash të organizatës kriminale të vëllezërve Hajdar dhe Franc Çopja, përmes aktivitetit të shit-blerjes së automjeteve.
Në bazë të informacionit që u paraqit në gjykatë, për Dumanin dhe Stafën nuk është zbatuar në procedurë e mirëfilltë ekstradimi, por ata janë sjellë nëpërmjet procedurës së deportimit ose dëbimit nga Emiratet e Bashkuara Arabe.
Dyshja u sollën në Shqipëri të mërkurën e 11 qershorit, nga Dubai përmes një fluturimi tranzit nga Turqia.
