Ferma e Hekuran Metës ndodhet në fshatin Val të Bulqizës. Ai thotë se vetëm 24 orë më parë veterinarët e zonës asgjësuan 200 krerë dhi të prekura nga murtaja e ruminatëve, ndërsa sonte e ka radhën pjesa e mbetur, fermeri kërkon të dëmshpërblehet dhe stani i tij i boshatisur të mbushet sërish me bagëti të imët.
“Këto kanë ngordhur sot, është një dëm i paimagjinueshëm, kjo ishte mënyra ime e jetesës, kjo ishte buka ime. Në këtë vend edhe rusi nuk na gjente jo më virusi”, shprehet fermeri Hekuran Meta.
“I vranë këtu para derës sime me çfarë do të jetoj unë tani më thoni, ky ishte i gjithë malli im. Nuk dua para, por dhi, sepse paret i prish shpejt dhitë më sigurojnë jetesën”, shprehet Bajram Meta, fermer.
“Nëse e llogaris dëmin e këtij sezoni me qumështi dhe keca llogaritet dikur tek 100 mijë euro. Mora fund dua të dëmshpërblehet malli im, asgjë më tepër”, thon fermeri Meta.
Fshati Val është i braktisur gjithsej aty ka vetëm dy familje dhe tufa e vetme e dhive ishte kjo e Hekuranit, ky fshat është shumë larg duhet katër orë nga Tiranë apo nga Bulqizë që të mbërrish këtu, e pavarësisht kësaj murtaja erdhi dhe fajin për këtë e kontrabanda e kafshëve, pasi në tregjet e gjësë së gjallë të vendit tonë shiten dhi me matrikuj dhe pa certifikatë shëndetësore.
“Murtajën e kanë sjellë pasi unë nuk kisha nga të merrja këtu. Dikush në këtë fshat bleu disa qingja në Korçë dhe ai mi infektoi dhitë”, përfundon fermeri.
“Më mbeten zilet bosh veç me ja var njerëzve të shtëpisë tani”, theksoi Bajram Met, fermer.
Murtaja është një sëmundje e re për Shqipërinë, por jo për shkencën e mjekësisë veterinare, kjo sëmundje mund të marrë fund nëse Ministria e Bujqësisë nis menjëherë vaksinim në të kundër të gjitha fermat që preken nga ky infeksion do të kenë fatin e fermës së Hekuranit, ku në vend të dhive kanë mbetur këmbora./TCH
