Më shumë se 3500 persona humbën jetën ose u zhdukën në përpjekje për të kaluar detin drejt Europës gjatë vitit 2024.
Agjencia e Bashkimit Europian për të Drejtat Themelore, në raportin e saj thekson zhvillimet kryesore dhe boshllëqet në peizazhin e të drejtave në union gjatë vitit të kaluar, me migracionin që mbetet një shqetësim kryesor.
Pavarësisht rregullave të reja të Bashkimit Europian për azilin dhe migracionin, agjencia thotë se shkeljet e të drejtave në kufij vazhduan dhe mungesa e operacioneve adekuate të kërkim-shpëtimit në Mesdhe vazhdon të vërë jetë njerëzish në rrezik.
Gjatë vitit që lamë pas 3,642 persona humbën jetën ose u zhdukën gjatë përpjekjes për të arritur në kontinentin e vjetër përmes detit, një rënie e lehtë nga 4,088 që ishin në vitin 2023.
Në raport kritikohen edhe hetimet joefektive për abuzimet në kufi dhe bëhet thirrje për mekanizma më të fortë monitorimi, kushte më të mira për të sapoardhurit dhe mbështetje për aktorët e shoqërisë civile që angazhohen në kërkim-shpëtim dhe që shpesh përballen me kriminalizim.
Agjencia e Bashkimit Europian gjithashtu ngriti alarmin për rritjen e racizmit, antisemitizmit dhe urrejtjes kundër myslimanëve në vendet e unionit, duke theksuar se gati gjysma e myslimanëve në Evropë përjetojnë diskriminim racor.
