Nga Boldnews.al
Strukturat shtetërore në Shqipëri kanë perfeksionuar rregullën e pashkruar të “harresës brenda tre ditëve”, për skandalet apo ngjarjet problematike. Por, për fat të keq, ky rregull po aplikohet edhe për ngjarje të rënda, ku viktimë e atentateve janë fëmijët e vegjël.
Rreth dy muaj më parë, një krim shumë i rëndë tronditi Tiranës. Dy fëmijë të mitur, përkatësisht djali dhe nipi injë biznesmeni të njohur, si edhe dy shoqërues të tyre, u plagosën rëndë, pas një atentati me nuanca mafioze, në zonën e Lundrës, në Unazën e Madhe, pranë Tregut Ushqimor.
Policia deklaroi se u ngrit në alarm për të gjetur autorët dhe, si gjithnjë, premtoi zbulimin e shpejtë të autorëve. Por, kur kanë kaluar rreth 60 ditë, asnjë sinjal nuk është dhënë nga uniformat blu për gjetjen e duarve që lëshuan plumba mbi dy të mitur, të cilët po udhëtonin në automjet mbrëmjen e 17 Prillit 2025.
Jo vetëm që autorët ende nuk janë zbuluar, por askush nuk mbajti përgjegjësi për dështimin në kontrollin e territorit.
Zona ku ndodhi atentati është përgjegjësi territoriale e Komisariatit numër 1, në Tiranë, i drejtuar nga Robert Losha.
Drejtuesi Losha u emërua në këtë detyrë në nëntor të vitit 2024, pas një konkursi të shumëdebatuar të zhvilluar nga kryepolici, Ilir Proda.
Para emërimit në Tiranë, Losha ishte shef krimesh në komisariatin e Elbasanit, ku drejtor ishte vetë Proda, para se të merrte firmën e kryeministrit për të drejtuar Policinë e Shtetit.
Losha ishte vartës direkt i Roven Zekës, i cili, nga ish-shefi i Komisariatit të Elbasanit, u katapultua në Shef të Qarkullimit Rrugor të Tiranës, detyroi që e mbajti për pak muaj, pasi përfundoi në burg, nën akuzat e korrupsionit.
Pra, shefi i Komisariatit nr.1, Robert Losha, është një prej atyre që patën sukses në “konkursin” e zhvilluar nga Proda, një procedurë, nga e cili, rastësisht dy vartës të kryepolicit në Elbasan, arritën të siguronin vende pëllumbash në Tiranë.
Roven Zeka iku nga qarkullimi, për shkak të një hetimi të Prokurorisë së Posaçme. Por, Robert Losha, vijon të mbajë fuqishëm pozitat e tij, edhe pse rezulton se ka dështuar në mënyrë spektakolare me zbulimin e atentatorëve të dy fëmijëve të mitur.
Ngjarja ka ndodhur rreth orës 21:50 të 17 prillit pranë Tregut Agro Ushqimor në Tiranë. Nga një mjet në lëvizje është qëlluar në drejtim të automjetit “G Class”, në të cilin po udhëtonin shtetasit Arenc Sefa, 34 vjeç, Kian Mullahi, 19 vjeç, si edhe dy të miturit, B.D. 11 vjeç dhe M.D. 17 vjeç, djali dhe nipi i pronarit të kompanisë “Pelikani Security”.
Menjëherë pas ngjarjes, Policia ngriti dyshimet se atentati mund të ishte ngatërrim shënjestre, pasi, thuajse në të njëjtën kohë, u vra në Pllajë të Lezhës 64-vjeçari Gjovalin Prendi, babai i një personazhi të njohur të botës së krimit, Roan Brahimi, edhe ky i vrarë më parë në Greqi.
Por, të dhënat e mëpasshme treguan se të ngatërruarit në këtë histori ishin vetëm uniformat blu. Dy ngjarjet nuk duket se kishin lidhje me njëra-tjetrën, por ato u “ngatërruan” nga shefi i Komisaritit nr.1, Robert Losha dhe vartësit e tij.
Ajo “ngatërresë” e momenteve të para pas atentatit vijon edhe tashmë kur kanë kaluar dy muaj. Policia nuk rezulton të ketë rënë në gjurmë të atentatorëve, megjithëse shefi Robert Losha vijon të shijojë pa asnjë grishje ndërgjegjeje detyrën e tij.
