Brad Pitt ka folur për herë të parë për përfundimin e divorcit të tij me Angelina Jolie pas më shumë se tetë vjet betejash ligjore. Ai tha se nuk ndihet veçanërisht i lehtësuar, por e sheh marrëveshjen si një përmbyllje ligjore të procesit. Ndërkohë, Jolie është përqendruar në gjetjen e paqes për familjen, ndërsa Pitt po fokusohet tek projekti i tij i ri filmik F1.
Ndërsa Pitt, 61 vjeç, u ul për një intervistë me revistën GQ për të diskutuar mbi filmin e tij të ardhshëm me temë gara, F1, në një artikull të publikuar të mërkurën, më 28 maj, fituesi i Oscarit shmangu pyetjet nëse ndihej i “lehtësuar” pasi ai dhe Jolie, 49 vjeçe, arritën një marrëveshje për divorc më 30 dhjetor 2024. Jolie kishte nisur procedurat për ndarjen e tyre në shtator 2016.
“Jo, nuk mendoj që ishte një gjë kaq e madhe,” tha Pitt. “Thjesht diçka që u konkretizua. Ligjërisht.”
Jolie kishte kërkuar divorc nga Pitt pak ditë pasi ata u kthyen nga një fluturim privat ku ajo pretendoi se Pitt kishte ushtruar dhunë ndaj saj dhe gjashtë fëmijëve të tyre. Autoritetet nuk e akuzuan atë pas hetimeve dhe Jolie nuk kërkoi ndjekje penale. Aktorët, të cilët kanë gjashtë fëmijë Maddox, 23 vjeç, Pax, 21, Zahara, 20, Shiloh, 19, Knox dhe Vivienne, 16 vjeç –filluan të dilnin në mes të viteve 2000 dhe u martuan në vitin 2014.
Një përfaqësues i Pitt nuk pranoi të konfirmonte ose komentonte marrëveshjen e divorcit në dhjetor. Megjithatë, një burim i afërt me Pitt i tha revistës ‘People’ në mars se aktori ishte “i lumtur që divorcimi ishte pas tij” dhe se ai dhe e dashura e tij, Ines de Ramon, me të cilën ka qenë në lidhje që nga viti 2022, “janë në një situatë shumë të mirë.”
Avokati i Jolie, James Simon, i tha ‘People’ në kohën e marrëveshjes së divorcit se aktorja “ka përqendruar energjitë e saj për të gjetur paqe dhe shërim për familjen e tyre” gjatë viteve pas betejës së gjatë ligjore. “Kjo është vetëm një pjesë e një procesi të gjatë që ka nisur tetë vite më parë,” tha Simon në atë deklaratë.
“Sinqerisht, Angelina është e lodhur, por ndihet lehtësuar që kjo pjesë ka përfunduar.”
Pitt foli hapur për faktin se “jeta e tij personale është gjithmonë në lajme” ndërsa diskutonte për F1, ku ai dhe Damson Idris luajnë si pilotë Formula 1.
“Është në lajme prej 30 vjetësh, shoku. Ose ndonjë version i jetës sime personale, ta themi kështu,” i tha ai GQ-së në intervistë. Kur u pyet nëse e sheh xhirimin e F1 si një “strehë nga gjithë vëmendja” që merr, aktori u përgjigj: “Hm, nuk e shoh kështu.”
