Policia ka zbardhur ngjarjen e ndodhur mëngjesin e djeshëm, në fshatin Marikaj, Vorë, dhe ka arrestuar 40-vjeçarin që u vetëplagos aksidentalisht në banesë, me armën e zjarrit që e posedonte pa leje. Policia zbulon se pasi u vetëplagos, 40-vjeçari shtiu me armë disa herë që të inskenonte një atentat ndaj tij dhe ti shpëtonte prangosjes, por pa rezultat.
40-vjeçari rezulton i dënuar më parë për armëmbajtje pa leje dhe për krime kundër pronës.
Në pranga u vendos edhe një 43-vjeçar për moskallëzim krimi.
“Në vijim të veprimeve hetimore të kryera nga Komisariati i Policisë Vorë, në drejtimin e Prokurorisë, për zbardhjen e rrethanave të plagosjes me armë zjarri të një shtetasi, i cili ishte paraqitur në spital, për ndihmë mjekësore, u bë e mundur zbardhja dhe dokumentimi i rrethanave të ngjarjes. Në përfundim të veprimeve për rastin, u arrestuan shtetasit:
E. A.(M.), 40 vjeç (shtetasi i dëmtuar) dhe S. K., 43 vjeç, të dy banues në fshatin Marikaj.
Nga hetimet dyshohet se 40-vjeçari është vetëplagosur aksidentalisht, në banesë, me një armë zjarri, të cilën e posedonte pa leje dhe më pas ka shtënë disa herë, që të inskenonte një atentat ndaj tij. Për të penguar zbulimin e së vërtetës, ky shtetas ka hequr DVR-në e një kamere të sigurisë pranë banesës së tij.
Shtetasi S. K. e ka transportuar 40-vjeçarin në spital dhe gjatë veprimeve procedurale nga Policia, nuk ka kallëzuar për rrethanat e ngjarjes.
40-vjeçari vijon të jetë në kujdesin e mjekëve, jashtë rrezikut për jetën.
Arma e zjarrit u gjet në banesën e këtij shtetasi dhe u sekuestrua në cilësinë e provës materiale.“- njofton policia.
Materialet procedurale i kaluan Prokurorisë, për veprime të metejshme.
