Luka Modriç do të luajë në fundjavë ndeshjen e fundit në shtëpinë e Real Madrid. “Galaktikët” kanë zyrtarizuar vendimin për mbylljen e bashkëpunimit me 39-vjeçarin.
Eksperienca e fundit me Realin do të jetë në Botërorin e klubit. Kështu nga muaji korrik, nëse Modriç nuk tërhiqet nga futbolli do të ketë mundësinë për tjetër aventurë.
I bashkuar me Realin në vitin 2012, Modriç u kthye në një nga lojtarët më të rëndësishëm për gjigandët spanjollë.
39-vjeçari numëron 590 paraqitje me Realin, duke fituar 28 trofe, përfshirë këtu 6 UEFA Champions League, 6 Kupat e Botës për Klube të FIFA-s, 5 Superkupa UEFA, 4 tituj të La Ligës, 2 Kupa e Mbretit dhe 5 Superkupa të Spanjës.
Suksesi më i madh individual gjatë kohës si lojtar i Realit ishte fitimi i Topit të Artë. Po ashtu lojtari më i mirë i FIFA-s dhe UEFA-s në vitin e paharrueshëm për të, 2018.
“Real Madridi i uron Luka Modriçit dhe familjes së tij gjithë të mirat në këtë fazë të re të jetës së tyre. Santiago Bernabeu do t’ju nderojë këtë të shtunë, në sfidën e fundit që do të luash me ekipin tonë” – shkruan Reali ndër të tjera në postimin e gjatë në rrjetet sociale.
Vendimi ishte disi i papritur, pasi vetë Modriç kërkonte të vazhdonte bashkëpunimin për të paktën edhe një sezon.
View this post on Instagram
