Sivasspor po lufton në javët e fundit të Superligës turke të futbollit për të mbetur në elitë, por në klubin bardhekuq kanë ndodhur çudira.
Trajneri ka përjashtuar nga ekipi Rey Manajn, sulmuesin më të mirë që ka në ekip, me pretendimin se nuk po performon si dhe sa duhet.
Trajneri Rıza Çalımbay kishte kritikuar publikisht Rey Manajn pas barazimit pa gola kundër Bodrum FK, duke vënë në dyshim përkushtimin dhe formën e tij.
“Nuk kemi një skuadër të plotë. Po mundohemi të aktivizojmë kë kemi në dispozicion. Rrezikuam dhe futëm në lojë të gjithë sulmuesit për të fituar ndeshjen. Rey Manaj duhet të përpiqet më shumë. I githë Sivasi e do dhe e quan lojtar të mirë, atëherë duhet të luajë si i tillë. Nuk pati asnjë rast për shënim. Pse ta mbaj në fushë një lojtar pa asnjë rast? Nuk ishte dita e tij, ndaj e zëvendësuam”, kishte thënë trajneri.
Pesë ditët e fundit Manaj nuk ka qenë në stërvitjen e klubit. Drejtuesit e skuadrës kanë shkuar me vendimin dramatik të përjashtimit, teksa sulmuesi i Kombëtares e ka mbyllur sezonin para kohe.
