Presidenti i SHBA-së, Donald Trump, pranoi të takohet me presidentin sirian, Ahmad al-Sharaa, gjatë vizitës së tij në Arabinë Saudite të mërkurën, sipas një zyrtari të Shtëpisë së Bardhë.
“Presidenti pranoi ta përshëndesë presidentin sirian nesër në Arabinë Saudite”, tha zyrtari të martën, duke kërkuar të mbetet anonim.
Takimi pritet të zhvillohet në Riad, ku Trump mbërriti të martën herët, si pjesë e udhëtimit të tij të parë jashtë shtetit që nga marrja e detyrës në janar.
Trump u tha gazetarëve të hënën përpara se të nisej për në Arabinë Saudite se po shqyrton heqjen e sanksioneve të SHBA-së ndaj Sirisë, pasi dëshiron të krijojë një “fillim të ri” për Damaskun.
“Do të na duhet të marrim një vendim për sanksionet, të cilat mund t’i lehtësojmë shumë mirë. Mund t’i heqim ato nga Siria sepse duam t’u japim një fillim të ri. Por Presidenti Erdogan më ka pyetur për këtë, shumë njerëz më kanë pyetur për këtë”, u tha Trump gazetarëve në Shtëpinë e Bardhë.
Deklaratat sinjalizojnë se Perëndimi mund të heqë së shpejti sanksionet ndaj Sirisë, ndërsa ajo kërkon të rindërtohet pas gati 15 vitesh të një lufte civile shkatërruese.
Bashar al-Assad, i cili sundoi Sirinë për gati 25 vjet, iku në Rusi më 8 dhjetor, duke shënuar fundin e sundimit të Partisë Baath që filloi në vitin 1963, pasi grupet anti-regjim morën kontrollin e Damaskut./ AA.
