Një makinë e përdorur nga Papa Françesku do të transformohet në një klinikë të lëvizshme për fëmijët në Rripin e Gazës, në përputhje me një dëshirë që ai shprehu kur ishte gjallë, njoftoi Vatikani. Automjeti është një Mitsubish që Papa e përdori gjatë vizitës së tij në Betlehem në vitin 2014.
“Puna ka filluar tashmë” për të shndërruar automjetin e vogël të bardhë, sqaroi Caritas, shoqata humanitare e Vatikanit.
Kur të hapet korridori humanitar me Gazën, automjeti që do t’i vihet në dispozicion Caritas Jerusalem do të jetë gati për të ofruar kujdes bazë për fëmijët. Kjo klinikë e vogël lëvize do të jetë e pajisur me komplete qepjeje, shiringa, oksigjen dhe vaksina të ruajtura në një frigorifer të vogël. Mjeti, i cili do të ketë një shofer, do të menaxhohet nga një ekip mjekësh.
“Ky automjet shpreh dashurinë dhe solidaritetin e Shenjtërisë së Tij për më të prekshmit, të cilën ai e ka shprehur gjatë gjithë krizës në Gaza”, komentoi sekretari i përgjithshëm i Caritas Jerusalem, Anton Safar.
Një ditë para vdekjes së tij, në mesazhin e Pashkëve të lexuar nga asistenti i tij nga ballkoni i Bazilikës së Shën Pjetrit në Romë, Papa Françesku kritikoi “situatën dramatike dhe të neveritshme humanitare” në Gaza. Me këtë rast, ai kishte përsëritur thirrjen e tij për armëpushim në enklavën palestineze dhe për lirimin e pengjeve izraelite.
Pas vdekjes së Papa Françeskut, Presidenti i Autoritetit Palestinez, Mahmoud Abbas, e kishte cilësuar Papa Françeskun si një mik besnik të popullit palestinez dhe të drejtave të tij legjitime, duke vënë në dukje se ai e kishte njohur shtetin palestinez dhe kishte lejuar ngritjen e flamurit palestinez në Vatikan.
