Mungon ende konfirmimi zyrtar, por tashmë nuk ka pikë dyshimi që Xabi Alonso do të marrë drejtimin e Real Madridit për sezonin e ardhshëm. Te Leverkusen tashmë e kanë pranuar këtë gjë dhe kanë piketuar zëvendësuesin ideal të spanjollit.
Nga Gjermania, burime të ndryshme thonë se Erik ten Hag është favoriti kryesor për të pasuar Xabi Alonso-n te stoli i Leverkusen. Klubi i “Aspirinave” po kërkon një profil që kombinon përvojën evropiane, aftësinë udhëheqëse dhe vizionin sulmues, cilësi që i gëzon më së miri Erik ten Hag, pavarësisht se aventura e fundit te Manchester United nuk shkoi siç pritej.
Edhe pse “hija” e Xabi Alonso do ta ndjekë për një kohë të gjatë duke ditur suksesin që ka arritur trajneri spanjoll, por Ten Hag ka provuar në faza të ndryshme të karrierës së tij se di të ndërtojë ekipe të forta me personalitet dhe të afta për të konkurruar në nivelin më të lartë.
