Ministri i Shtetit për Pushtetin Vendor, Arbjan Mazniku, është thirrur për t’u marrë në pyetje nga Prokuroria e Tiranës.
Mediat raportojnë se Arbjan Mazniku ka dëshmuar në kuadër të një hetimi të hapur për veprën penale “shpërdorim detyre”, lidhur me periudhën kur kryebashkiaku Erion Veliaj i kishte deleguar kompetencat. Bëhet fjalë për një kallëzim të ish-deputetit të PD-së, Belind Këlliçit.
Ende nuk dihen detajet e dosjes dhe pse po hetohet nga Prokuroria e Tiranës, për shkak se Arbjan Mazniku, si zyrtar i lartë është kompetencë e SPAK-ut.
Kujtojmë se Arbjan Mazniku aktualisht është drejtues politik i PS-së për Qarkun e Elbasanit dhe kryesuesi i listës së kandidatëve socialistë për zgjedhjet e 11 Majit për këtë qark.
