Anëtari i PPE në Parlamentin Evropian, Antonio López-Istúriz White, ishte sot i pranishëm në takimin e kryedemokratit Sali Berisha me gratë dhe vajzat në Tiranë. Spanjolli mbajti dhe një fjalë në mbështetje të Berishës dhe Partisë Demokratike për zgjedhjet e 11 majit.
Antonio Lopez theksoi rolin e rëndësishëm të grave në shoqëri, duke i cilësuar më të mençura, më punëtore dhe më largpamëse se burrat.
Ai kritikoi socialistët, si në Shqipëri ashtu edhe në vende të tjera si Spanja dhe Kroacia, për mungesë reformash dhe hipokrizi politike. López-Istúriz vuri në dukje se socialistët nuk kanë emëruar kurrë gra në pozita kyçe në Parlamentin Europian, ndryshe nga Partia Popullore Evropiane.
Ai kritikoi qeverinë shqiptare për mungesë të garancive për zgjedhje të lira dhe paralajmëroi kundër “kredencialeve të rreme europiane”. Në përfundim, ai inkurajoi të djathtën shqiptare të mos dorëzohet dhe ftoi Sali Berishën të marrë pjesë në Kongresin e Partisë Popullore në Spanjë.
“Siç e përmendi edhe Elmar, kam vërejtur gjatë jetës sime që gratë janë më inteligjente, më punëtore dhe më largpamëse. Për këtë arsye, gjithmonë i kam respektuar më shumë gratë. Ne burrat shpesh përqendrohemi te problemet e përditshme, ndërsa gratë shohin më larg, drejt së ardhmes. Kjo është shumë e rëndësishme, sepse gratë formojnë brezin e ri dhe përcjellin vlerat që Elmar përmendi, duke u bazuar në fakte konkrete.
Socialistët flasin shumë, por nuk bëjnë asgjë. Kjo nuk ndodh vetëm në Shqipëri, por edhe në Spanjë. E dini kush është miku më i madh i Edi Ramës në Evropë? Është Makroni. Dhe kush është Makroni? Një njeri që flet shumë bukur, që është bindës në fjalë, por në Francë gjatë 20 viteve të fundit nuk ka bërë asnjë reformë madhore. E gjithë puna e tij ka mbetur në fjalë.
Në Parlamentin Europian, ju përmendët figura si Nicole Fontaine dhe Simone Veil, gra të shquara, socialiste. Por ta them qartë për shqiptarët: socialistët asnjëherë nuk kanë emëruar një grua në pozicione kryesore të Parlamentit Europian. Këto janë fakte, jo propaganda. Është e vërteta.
Këtu në Shqipëri, ju përfaqësoni këtë realitet. Zonjë ministre, jam i lumtur që patët mundësinë të vini sot nga Kroacia. Më kujtohet kur Kroacia ishte vend kandidat për anëtarësim në BE. Kam qenë aktiv në mbështetjen e Kroacisë dhe e mbaj mend mirë që Partia Socialiste e Kroacisë ishte gjithmonë negative ndaj anëtarësimit. Kur Andrej Plenković negocionte për anëtarësim, socialistët ishin kundër, dhe vetëm pasi humbën zgjedhjet, ndryshuan qëndrim. Kjo është hipokrizi, si në Kroaci, ashtu edhe në Shqipëri dhe në Spanjë.
Ju përmendët që Andrej Plenković është zgjedhur tre herë radhazi në zgjedhje të lira dhe transparente. Nuk ka asnjë ngjashmëri me atë që ndodh sot në Shqipëri.
Përse në vitin 2025 duhet që vëzhguesit ndërkombëtarë të vijnë në Shqipëri për të mbikëqyrur zgjedhjet? Sepse qeveria shqiptare nuk është në gjendje të garantojë zgjedhje të lira. Dhe kur flitet për problemet, nuk është faji i shqiptarëve, por i qeverisë së tyre.
Ju lutem, mjaft me kredenciale të rreme europiane. Shqipëria është pjesë e Europës. Ne udhëtojmë, shohim botën. Kur vij në Shqipëri, ndihem si në Spanjë, një vend mesdhetar, europian, dhe nuk kam asnjë dyshim për këtë.
Mos dëgjoni çfarë thotë kryeministri që e sheh humbjen e tij të afërt në zgjedhje. Ne nuk organizuam një konferencë për të fyer liderin e opozitës. Ne ishim këtu për të miratuar statutin e shoqatës së grave të qendrës së djathtë, një akt që u miratua dje në Tiranë dhe që është një fakt i rëndësishëm.
Mesazhi im për ju është ky: Mos hiqni dorë! Ne në shumë vende europiane kemi duruar gënjeshtrat e socialistëve, por nuk jemi dorëzuar. Muri i Berlinit ra në vitin 1989 dhe socializmi po bie gjithandej.
Sot, vetëm tre ose katër qeveri socialiste kanë mbetur në Europë. Në Sllovaki, anëtarësimi i kryeministrit socialist në grupin europian është pezulluar. Fatkeqësisht kemi ende një në Spanjë, por edhe atje gjërat po ndryshojnë.
Kryetar Berisha, për mua ju jeni dhe do të mbeteni Kryetar. Ju ftoj që javën tjetër të vini në Spanjë, në Kongresin e Partisë Popullore në Valencia. Kjo është shumë e rëndësishme për ne.
Mos hiqni dorë! Ju jeni ata që do të formoni brezin e ri dhe do t’i mësoni si të ndryshojnë Shqipërinë. Lufta juaj është e vështirë, por e domosdoshme. Edhe ne në vendet tona vuajmë nga simptomat e fundit të socializmit, por fitorja është pranë“,tha eurodeputeti.
