Real Madridi ka konfirmuar sot një lajm të hidhur për tifozët e vet: Eduardo Camavinga ka pësuar një këputje të plotë të tendinës së aduktorit të këmbës së majtë, çka do ta detyrojë të mungojë deri në fund të sezonit. Mesfushori francez humb kështu jo vetëm ndeshjet e mbetura të kampionatit, por edhe pjesëmarrjen në Kampionatin Botëror të Klubeve.
Sipas raportimeve mjekësore, koha e rikuperimit pritet të jetë dy deri në tre muaj, në varësi të ecurisë së rikuperimit. Duke qenë se sezoni praktikisht ka përfunduar për Camavinga-n, qëllimi i stafit mjekësor është që lojtari të rikthehet në formë të plotë për fillimin e sezonit të ardhshëm.
Një sezon i mallkuar për Camavingan
Ky dëmtim i fundit vjen në fund të një sezoni të pafat për Camavinga-n, i cili nuk arriti kurrë të shfaqte nivelin e pritshëm për shkak të dëmtimeve të shumta. Sezoni nisi keq që në gusht, kur një dëmtim në gju gjatë një stërvitjeje përpara finales së Superkupës së Europës e la jashtë fushave për më shumë se një muaj.
Pas rikthimit, problemet vazhduan me dëmtime muskulore – një në dhjetor dhe një tjetër në janar – që i kushtuan tetë ndeshje mungesë gjithsej. Lëndim pas lëndimi, Camavinga nuk arriti kurrë të kapte formën optimale dhe nuk u bë pjesë fikse e formacionit të parë të Ancelottit.
Një tjetër dëmtim në prag finaleje
Ashtu si në gusht, dëmtimi i radhës ndodhi pikërisht në prag të një tjetër finaleje, këtë herë në Kupën e Mbretit kundër Barcelonës. Ancelotti e kishte planifikuar ta aktivizonte nga minuta e parë në krahun e majtë të mbrojtjes, për të përballuar shpejtësinë dhe driblimet e Lamine Yamalit.
Për ta ruajtur për finalen, Camavinga u la pushim ndaj Getafes, por dëmtimi i Alaba-s e detyroi trajnerin ta fusë në lojë në minutën e 45’ në mesfushë. Dhe në minutën e 85’, pas një përplasjeje me Milla-n, ndodhi fatkeqësia: “Më është këputur,” – i tha ai fizioterapistit teksa largohej drejt dhomave të zhveshjes. Shkalla e dëmtimit u konfirmua më vonë nga ekzaminimet mjekësore.
