I penduari i drejtësisë, Nuredin Dumani ka vijuar me dëshmitë e forta në sallën e gjyqit në GJKKO, ku iu përgjigjet pyetjeve të të pandehurve të tjerë.
Nuredin Dumani ka deklaruar se me Beharj Bajrin ka folur përmes Elton Bashës dhe Arlind Bushatit, ku ky i fundit u vra në masakrën e Dobraçit, teksa ndodhej në automjet me Hamza Licin.
Sipas Dumanit, Behar Bajri i ka kërkuar vrasjen e Dorian Dulit dhe Genc Tafilit dhe sipas të penduarit të SPAK, ai i ka kërkuar 1.5 milion euro për të kryer vrasjet.
Dumani tha se i ka kërkuar Behar Bajrit që t’i gjente dhe Talo Çelën, ku sipas tij, kishte thashetheme se e mbante Suel Çela.
Avokati: A njeh një Elton Basha?
Nuredin Dumani: Po është miku im nga Burreli. Shkurt i thërrisja Toni, ndërsa në telefon e kisha me emrin “Bisha”. Herën e fundit e kam takuar në Kosovë. Erdhi disa herë tek unë. E kam takuar si shok.
Avokati: Si ke folur me Behar Bajrin?
Nuredin Dumani: Kam folur përmes Elton Bashës dhe Arlind Bushatit, që u vra. Deri në atë moment nuk kisha folur ende me Behar Bajrin. Fillimisht çova një djalë nga Dibra. U nisëm natën. Gjithë natën mbajta kontakt me Eltonin. Janë takuar në një fushë. Ata ishin disa veta. Unë isha në Kosovë.
Avokati: Çfarë kërkoi Behar Bajri?
Nuredin Dumani: Fola në telefon, madje pak të tensionuar. Më kërkoi të bëja goditje, Dorian Dulin, Genc Tafilin e të tjerë. Unë i kam vënë një çmim 1.5 mln euro.
Avokati: Ti çfarë i ke kërkuar Behar Bajrit?
Nuredin Dumani: Unë i kërkova Talo Çelën. I thashë të ma gjente ku ishte. Ai më tha, kam informacion se ku ndodhet.
Avokati: A kishe info se Talo Çela rrinte te Sueli?
Nuredin Dumani: Informacion jo, por thashetheme po. Suel Çela më ka thënë që ka bërë takim me Talon, por jo ta ketë mbajtur.
