Alvaro Morata, sulmuesi i Galatasaray-t dhe ish-lojtar i Juventusit e Milanit, ka mohuar me forcë çdo përfshirje të tij në skandalin e basteve me Nicolò Fagioli-n, aktualisht pjesë e Fiorentinës.
Emri i Morata-s doli në disa media italiane si pjesë e një bisede të Fagioli-t me ish-shokun e tij të skuadrës te të rinjtë, Zanandrea, ku përmendej një “Alvaro” që e ndihmonte për blerjen e orëve – metodë që dyshohet se përdorej për të fshehur borxhet e basteve.
Por Morata e ka mohuar kategorikisht këtë gjë përmes një deklarate publike:
“Kam parë informacionet që po qarkullojnë për mua dhe dua të sqaroj se e vetmja gjë që kam bërë për të ndihmuar Fagioli-n gjatë këtyre viteve ka qenë t’i jap këshilla për karrierën e tij, si mik dhe si dikush me më shumë përvojë. Nuk kam ditur kurrë asgjë për situatën e tij.”
Sulmuesi spanjoll shtoi më tej:
“E dua shumë Nicolò-n dhe shpresoj që të mund të përmirësojë gabimet e tij sa më shpejt. Por dua të jem i qartë: nuk kam asnjë lidhje me këtë histori dhe ju lutem të mos përhapni lajme të rreme apo gënjeshtra. I mohoj të gjitha informacionet që kanë dalë për mua sepse janë të pavërteta. Faleminderit.”
Morata kërkon kështu të pastrojë imazhin e tij dhe të distancohet nga një prej skandaleve më të mëdha që ka tronditur futbollin italian vitet e fundit.
