Kupa e Botës mund të zhvillohet me një numër të pabesueshëm skuadrash në edicionin që përkon me 100 vjetorin e tij, atë të vitit 2030.
CONMEBOL, konfederata e Amerikës së Jugut, në hapjen e Kongresit të saj të zakonshëm, ka bërë të ditur se ka dorëzuar kërkesën zyrtare në FIFA që numri i skuadrave pjesëmarrëse në atë edicion të rritet në 64.
Duke filluar nga turneu i vitit 2026, Kupa e Botës do të ketë 48 ekipe pjesëmarrëse, por amerikano-latinët kërkojnë që numri të ritet, në mënyrë që të kthehet në një festë globale, meqë është shifër jubilare.
Aktiviteti në fjalë do të fillojë me ndeshjet inauguruese në Argjentinë, Uruguai dhe Paraguai, ndërsa më pas turneu do të zhvillohet në Spanjë, Portugali dhe Marok.
“Jemi të bindur që festimi i 100-vjetorit duhet të jetë diçka unike, pasi vetëm një herë mbushen 100 vite. Për këtë arsye, po propozojmë që një herë të vetme, ta zhvillojmë këtë 100 vjetor me 64 ekipe”, tha Alehandro Dominguez, presidenti i CONMEBOL.
“Në këtë mënyrë, të gjithë shtete kanë mundësinë që të përjetojnë një eksperiencë botërore dhe në këtë mënyrë askush në këtë planet nuk do të mbetet jashtë kësaj feste, pasi është festa jonë edhe pse luhet në të gjitha pjesët e globit”, tha ai.
