Deputetja e Partisë Demokratike, Ina Zhupa, ka denoncuar Partinë Socialiste për shkelje të legjislacionit zgjedhor në qytetin e Delvinës. Gjatë një deklarate nga ky qytet, Zhupa tha se PS ka hapur një zyrë elektorale vetëm 50 metra larg KZAZ-së, në kundërshtim me rregullat që kërkojnë një distancë prej të paktën 300 metrash.
“Sapo zbret shkallët e KZAZ-së, përballesh me propagandën e Partisë Socialiste, e cila pret votuesit në ditën e zgjedhjeve dhe administratën zgjedhore gjatë punës së tyre,” tha Zhupa.
Ajo i ka bërë thirrje Komisionerit Shtetëror të Zgjedhjeve që të ndërhyjë menjëherë dhe të mbyllë këtë zyrë elektorale, duke e cilësuar vendosjen e saj si një shkelje të qartë të ligjit.
Në ambientet e KZAZ-së në Delvinë do të zhvillohet numërimi i votave dhe do të funksionojnë dy qendra votimi në ditën e zgjedhjeve.
Deklarata e plotë:
Ndodhem në qytetin e Delvinës, këtu janë ambientet e KZAZ-së për Bashkinë e Delvinës.
Sipas legjislacionit zgjedhor çdo zyrë elektorale do të duhet të ketë një distancë të paktën 300 metra larg KZAZ-së dhe larg qendrave të votimit.
Në këtë ambient do të jetë KZAZ-ja siç është aktualisht, dhe do të jenë edhe 2 qendra votimi në ditën e zgjedhjeve.
Partia Socialiste, kandidatët e saj të listës së hapur, kanë shkelur legjislacionin zgjedhor dhe udhëzimin e Komisionerit Shtetëror të Zgjedhjeve duke hapur një zyrë elektorale jo më pak se 50 metra larg KZAZ-së.
Pra sapo zbret shkallët e KZAZ-së t`i ke propagandën e Partisë Socialiste që pret votuesit ditën e zgjedhjeve apo administratën zgjedhore gjatë punës së tyre në KZAZ.
Kjo është e ndaluar nga ligji dhe i kërkojmë Komisionerit Shtetëror që menjëherë të marrë masat për mbylljen e kësaj zyre elektorale në qytetin e Delvinës.
