Eksperti i sigurisë ushqimore dhe kimisti Sokol Abazi ka komentuar rastin e filetove të pulës më salmonelë, të cilat u hodhën në tregun shqiptar.
Sipas tij, puna ka çaluar në të gjitha instancat, që nga nisja e mallit në vendin e origjinës, në doganë dhe deri tek veprimet e Autoritetit Kombëtar të Ushqimit.
Abazi tha se nga ky rast duhet të dalin disa mësime, një prej të cilave është fakti që me cënimin e besimit, kompanitë që u përfshinë në këtë rast nuk duhet të quhen më të sigurta, por duhet ti nënshtrohen kontrolleve.
“Puna çalon që në doganë, që kur niset malli nga Brazili, tek veprimet, që ka bërë AKU, por duhet të nxirren disa mësime që kjo të mos ndodhë më. Nëse ato kompani deri tani janë konsideruar të sigurta, ato që janë certifikuar nga BE, nuk duhet të konsiderohen më të sigurta, pasi kanë një rast. Në rastin më të parë që ajo besueshmëri nuk ekziston, ato duhet të kontrollohen. S’ka ligj që ndalon që AKU që të bllokojë produktet deri në marrjen e analizës. Fakti që ata s’kanë vendosur këtë, justifikon vendimin e kompanisë që i ka shitur, pretendimi që mostra s’është marrë sipas procedurave, i jep të drejtë kompanisë të fitojë para cdo gjykate, për produkt të kompromentuar. Por si njeri që e njoh procedurën, është për të ardhur keq që rezultati merret pas 10 ditësh, kur ISUV mund t’i merrte brenda 3 ditësh”, tha ai në emisionin Open në News24.