Presidenti finlandez Alexander Stubbs bëri një udhëtim të papritur në Florida të shtunën për t’u takuar me Presidentin e SHBA Donald Trump.
Të dy liderët diskutuan për forcimin e bashkëpunimit dypalësh midis vendeve të tyre dhe luajtën golf.
“Presidenti Stubb dhe unë presim me padurim forcimin e bashkëpunimit midis Shteteve të Bashkuara dhe Finlandës dhe kjo përfshin blerjen dhe vendosjen e një numri të madh akullthyesësh për të cilat Shtetet e Bashkuara kanë nevojë, duke ofruar paqe dhe siguri ndërkombëtare për vendet tona dhe botën,” shkroi Trump në platformën e tij “Truth Social”.
Dy presidentët u takuan për mëngjes, luajtën golf dhe hëngrën drekë së bashku. Ata diskutuan gjithashtu çështje të politikës së jashtme, duke përfshirë Ukrainën.
Zyra e presidentit finlandez tha në një deklaratë se vizita e paparalajmëruar e Stubb me Trump ishte joformale. Trump mbërriti në pronën e tij në Mar-a-Lago në Palm Beach, Florida, të premten pasdite, përpara se të shkonte në klubin e tij të golfit në Ëest Palm Beach të shtunën në mëngjes për një turne golfi.
Takimi i Trump me Stubbs erdhi një ditë pasi zëvendëspresidenti J.D. Vance bëri një vizitë në Grenlandë.
Trump ka shprehur vazhdimisht interes për blerjen e Grenlandës. Qeveria daneze e kundërshton një veprim të tillë, ashtu si shumica e grenlandezëve.
Trump i tha NBC News në një intervistë të shtunën se ai “nuk do të përjashtonte kurrë forcën ushtarake” për të arritur qëllimin e tij, por tha se ai beson se ka “një shans të mirë” që mund të bëhet pa përdorur dhunën.
