Quhet Nelson Weiper, është vetëm 20 vjeç dhe aktivizohet si sulmues te Mainz 05 në Bundesligën gjermane. Talenti me origjinë shqiptare nga nëna, po bën Kombëtaren kuqezi që të ëndërrojë.
Lojtari i cili spikat për fizikun, duke qenë se është 1,91 metër i gjatë, duket se është i gatshëm të marrë në konsideratë aktivizimin te Shqipëria. Në fakt, gjithçka ka nisur nga një postim i babait të tij, Klaus Weiper, i cili publikoi një fotografi të Nelsonit me lojtarin tjetër me origjinë shqiptaro-gjermane, Brajan Gruda, duke i cilësuar “Dy shqiponja”.
Federata e futbollit thuhet se ka nisur kontaktet me sulmuesin, por edhe me familjen e tij, për të kuptuar nëse ai dëshiron të vishet kuqezi. Deri më tani, Nelson ka mbrojtur ngjyrat e Gjermanisë, duke kaluar nga përfaqësueset e 17 dhe 18 vjeçarëve, deri në skuadrën e 21-vjeçarëve,ku së fundmi ishte i grumbulluar dhe luajti në ndeshjen me Spanjën.
Nelson Weiper është pjesë e ekipit të parë të Mainz-it prej vitit 2022, ku ka regjistruar 29 ndeshje të luajtura dhe 4 gola të shënuar. Ai ka realizuar dy herë në këtë edicion të elitës së futbollit gjerman, ndaj Hedeinhaim dhe Stuttgart.
Për karakteristikat fizike që ka do të ishte lojtari që i mungon Kombëtares në sulm, për të fituar duelet në ajër dhe për të ndihmuar ekipin të dalë në manovrat ofensive.
