Trajneri i Brazilit, Dorival Júnior, ka konfirmuar se do të bëjë gjashtë ndryshime në formacion për ndeshjen klasike ndaj Argjentinës, e cila do të luhet në orët e para të mëngjesit të së mërkurës.
Katër prej këtyre ndryshimeve ishin të pritshme për shkak të dëmtimeve dhe pezullimeve. Ndryshimet fillojnë që nga porta, pasi Alisson duhet të qëndrojë pushim për shkak të protokollit të tronditjes në kokë.
Dorival Júnior sqaroi vendimet e tij:
“Kemi katër ndryshime të detyrueshme dhe të përcaktuara tashmë. Më pas, Matheus Cunha do të zëvendësojë João Pedro-n dhe Wesley do të marrë rolin e Vanderson-it.
Pjesa tjetër e ndryshimeve vjen si pasojë e mungesave që patëm në ndeshjen e fundit. Me gjashtë ndryshime, jam i bindur se do të kemi një ekip të përgatitur për të bërë një ndeshje të madhe kundër një kundërshtari të madh, të cilin e respektojmë shumë.”
I pyetur për rivalitetin mes dy ekipeve, Dorival kërkoi të ulte tensionin, ndryshe nga Raphinha, i cili në kanalin e Romário-s e ndezi atmosferën me një deklaratë të fortë:
“T’i godasim ata! Në fushë dhe jashtë saj, nëse është nevoja!”, tha sulmuesi i Barcelonës.
Megjithatë, Dorival theksoi rëndësinë e respektit në këtë përballje historike:
“Kjo është një nga klasiket më të mëdha të futbollit botëror. Në fushë do të ketë përballje, por do të ketë edhe respekt mes dy ekipeve.
Ne do të përpiqemi të luajmë futboll. Do të përballemi me kampionët e botës dhe të Kupës së Amerikës, ekipin më fitues në vitet e fundit.
Besoj se gjithçka do të vendoset në fushë, mes 22 futbollistëve të mëdhenj të botës.”