Ministria izraelite e Mbrojtjes njoftoi formimin e një agjencie speciale që do të jetë përgjegjëse për lejimin e palestinezëve të largohen “vullnetarisht” nga Rripi i Gazës, një vendim që u denoncua nga një OJQ izraelite.
Sipas ministrisë, kabineti i sigurisë miratoi planin e tij për një agjenci përgjegjëse për ” largimin vullnetar të banorëve të Gazës në një vend të tretë”.
Kjo agjenci mund të funksionojë nën Ministrinë e Mbrojtjes, por mund të “bashkëpunojë me organizatat ndërkombëtare” për të “garantuar kalimin e sigurt” të banorëve të Gazës në këto vende të tjera, thuhet në deklaratë, por pa përmendur se për cilat vende bëhet fjalë.
Ministri i Mbrojtjes, Israel Katz, sqaroi se ky propozim lidhet me deklaratat e Donald Trump, i cili deklaron se dëshiron largimin vullnetar të palestinezëve nga Rripi i Gazës .
Organizata joqeveritare izraelite “Paqe Tani” dënoi me një deklaratë formimin e kësaj agjencie “përgjegjëse për dëbimin e palestinezëve nga Gaza”, duke denoncuar qeverinë “e cila ka humbur çdo orientim dhe çdo logjikë”.
Duke formuar një agjenci të tillë për të “dëbuar” palestinezët, “Izraeli e pranon se po kryen krime lufte”, shtoi OJQ-ja, duke folur për “një njollë të pashlyeshme mbi shtetin e Izraelit”.
Formimi i një strukture administrative për zbatimin e këtij plani është përmendur javët e fundit nga ministri izraelit i financave Bezalel Smotrich.
Ushtria izraelite rifilloi operacionet e saj në shkallë të gjerë në Rripin e Gazës të martën, duke thyer armëpushimin që kishte hyrë në fuqi më 19 janar në enklavën e shkatërruar nga lufta, e cila shpërtheu pas sulmit vdekjeprurës të Hamasit ndaj Izraelit më 7 tetor 2023.
