Lot në sy, shikime të ulura, lojtarë që përqafohen… Nuk kishte asgjë veçanërisht të pazakontë në minutën e heshtjes që u mbajt të dielën, përpara ndeshjes së kategorisë më të lartë bullgare të futbollit mes Arda Kardzhali dhe Levski Sofias.
Në ekranet e stadiumit u shfaqën imazhet e Petko Ganchev, një ish-sulmues i Arda Kardzhali në vitet ’70 (autor i mbi 100 golave), për ta përkujtuar me rastin e… vdekjes së tij. Çfarë gafe! Ai ishte ende gjallë dhe shëndoshë e mirë. Kjo, natyrisht, shkaktoi një situatë të sikletshme për të gjithë.
Gjatë pjesës së parë të ndeshjes, drejtuesit e Arda mësuan se Ganchev ishte ende gjallë dhe vazhdon t’i ndjekë të gjitha ndeshjet e ish-ekipit të tij. Ironia e fatit deshi që ai të kthehej në shtëpi më vonë se zakonisht atë ditë, duke humbur minutat e para të ndeshjes…, edhe minutën e heshtjes së mbajtur në nder të tij.
Një situatë që detyroi klubin të kërkonte falje publike në rrjetet sociale: “Drejtuesit e klubit duan të kërkojnë ndjesë ndaj ish-lojtarit tonë dhe të afërmve të tij pas shpërndarjes së informacionit të rremë mbi vdekjen e tij. I urojmë shumë vite lumturi dhe shëndet të mirë, si dhe të vazhdojë të gëzojë suksesin e Arda”.
Po si reagoi vetë Ganchev pas këtij incidenti? “Çfarë bëra pasi dëgjova lajmin e vdekjes sime? Mbusha një gotë dhe ngrita dolli për shëndetin tim“, – përfundoi ai me humor.
