Përballë ambasadës amerikane, atje ku dikur ka qenë ish ambasada franceze do të hedhë shtat kullë 47 kate. Leja e zhvillimit të kullës u miratua një muaj më parë, në mbledhjen e 28 janarit dhe kompania ndërtuese e saj është Hanxhari Group.
Kjo kompani zotërohet nga Adjon Hanxhari, djali i ndërtuesit vlonjat, Fatmir Hanxhari, i cili njihet si pronari i hotelit Vlora Internacional.
Kjo në foto është renderi i kullës së lartë, në formën e drejtëkëndëshit dhe me fasadë xhami. Projekti është publikuar nga vetë kryeministri Edi Rama një ditë më parë, në profilin e tij në facebook, përmes një videoje 30 minutëshe, ku tregohej ndryshimi i Tiranës dhe vizioni për kryeqytetin e vitit 2030.
Nga fotoja duket se lartësia e Embassy Tower bën që Ambasador 3 dhe kulla e stadiumit Arena Kombëtare të duken si xhuxha. Ambasador 3 është një kullë 23 katëshe, rreth 82 metër e lartë. Ndërkohë që Embassy Tower e Hanxharit do të jetë të paktën dyfishi i saj.
Ndërtuesi
Hanxhari Group është themeluar në tetor të vitit 2018. Vitin e kaluar kompania regjistroi një xhiro totale prej 2.35 milionë euro dhe fitim neto prej 110 mijë eurosh. Sipas bilancit zyrtar, vlera e aseteve të kompanisë është 11.9 milionë euro. Por nga këto rreth 11.7 milionë janë detyrime, ndërsa kapitali i vet kompanisë është vetëm 230 mijë euro.
A mundet një kompani me këta tregues financiarë të realizojë një investim kaq të madh si kulla 47 katëshe, që do t’i zërë diellin ambasadës Amerikane, kostoja e së cilës mund të jetë edhe mbi 100 milionë euro?
Ndërsa bankat kanë filluar të jenë të kujdesshme në kreditimin e kullave të larta, shumë ndërtues shpresojnë në financimin e tyre përmes shitjeve në ajër. Por nuk mungojnë edhe rastet kur financimet vijnë nga burime të paqarta. Ose në raste të tjera, pas ndërtuesve që marrin lejet në letër qëndrojnë të tjerë persona të fshehtë.
Në çdo rast, Embassy Tower është qiellgërvishtësi i radhës që i shtohet zemrës së Tiranës./kapitali.al
