Real Sociedad, Plzen dhe Fenerbahce janë tre ekipet që sigurojnë “biletën” për në raundin tjetër të Europa League. Spanjollët e Sociedad eliminuan Midtjylland pas fitores 5-2 në “San Sebastian”.
Vendasit shënuan 2 gola në 20 minutat e para me Mendez dhe Sucic, por danezët barazuan përkohësisht shifrat me Buksa në minutën e 24′ me penallti dhe Osorio në minutën e 38′. Në minutën e fundit shtesë të pjesës së parë ishte sërish kroati Sucic që kaloi në avantazh Sociedad.
Fitoren e vulosi Oyarzabal i cili shënoi golin e katërt nga pika e bardhë e penalltisë në minutën e 73′. Në minutat e fundit pati kohë dhe për golin e pestë të shënuar nga Oskarsson.
Plzen mbylli llogaritë e kualifikimit ndaj Ferencvarosh që në pjesën e parë, ku çekët shënuan 3 gola, dy gola nga Durosinmi dhe Sulc. Hunagrezët vinin në këtë takim pas fitores 1-0 në fushën e tyre një javë më parë, por çekët përmbysën lehtësisht rezultatin në ndeshjen e kthimit.
Surpriza e mbrëmjes vjen nga Amsterdami, aty ku belgët e Royale Union fituan 0-2 në transfertë ndaj Ajax. Kualifikimi do të vendoset në kohën shtesë ose nga penalltitë, duke qenë se dhe ndeshja e parë kishte përfunduar 0-2 por për holandezët.
Në sfidën e fundit mes Anderlecht dhe Fenerbahces nuk kanë munguar golat. Rezultati aktual është 2-2, ndeshja u pezullua për 15-20 minuta për shkak të një sherri masiv në tribuna mes dy tifozerive. Situata u qetësua dhe ndeshja rifilloi normalisht. Ekipi i Mourinho-s ka fituar 3-0 në shtëpi, kështu që edhe me rezultatin aktual është i kualifikuar për më tej.
