Edi Martini do të jetë “timonieri” i ri i skuadrës së Trepças. Këto janë raportimet e fundit që vijnë nga Kosova. Bëhet me dije se palët kanë arritur sot marrëveshjen, teksa në ditët në vijim pritet të vijë edhe zyrtarizimi.
Martini do të pasojë trajnerin Emin Baliqin. Skuadra e Trepças, militon në Ligë ne Parë të Kosovës, teksa mban vendin e 4 në renditje me 26 pikë në 15 javë, 5 më pak se kryesuesit e Drenicës dhe 1 më pak se Vellaznimi i Mirel Josës që mban vendin e dytë.
Ditën e sotme, Trepça mposhti me rezultatin 2 me 4 Mitrovicën e vendit të fundit. Kjo do të jetë aventura e parë e Edi Martinit, në futbollin e Kosovës, teksa më herët ka drejtuar, Vllazninë, Luftëtarin dhe Teutën. Me skuadrën durrsake, tekniku shkodran ndërpreu bashkëpunimin më 21 janar të këtij viti, duke i lënë vendin Bledar Devollit.
