Presidenti francez Emmanuel Macron e ka cilësuar kthimin e Donald Trump në Shtëpinë e Bardhë dhe hapat e tij të fundit si president i SHBA-së me një “elektroshok” që duhet ta detyrojë BE-në të marrë përgjegjësinë për sigurinë e saj dhe të ardhmen e Ukrainës.
Në një intervistë me Financial Times të botuar të premten, dy ditë pasi Trump pati një bisedë telefonike me presidentin rus Vladimir Putin, Macron i kërkoi BE-së që të “tregojë muskujt” në mbrojtjen e saj dhe të ringjallë ekonominë e saj.
Blloku duhet të përqafojë “thirrjen strategjike të zgjimit”, të marrë përsipër më shumë përgjegjësi për sigurinë e tij dhe të zvogëlojë varësinë e tij si nga SHBA ashtu edhe nga Kina, tha ai.
“Është një elektroshok. Ne kemi nevojë për goditje asimetrike, kemi nevojë për goditje të jashtme. Është një tronditje ekzogjene për evropianët”, tha Macron për FT.
Sipas tij, modeli në të cilin BE-ja mbështetej në tregun kinez si një “dalje”, ” ombrellën amerikane” për sigurinë dhe “gazin e lirë rus” për prodhim nuk ekziston më.
Macron i bëri thirrje BE-së të reduktojë varësinë e saj nga armët amerikane dhe u kërkoi anëtarëve të bllokut të investojnë në sistemin e mbrojtjes ajrore franko-italiane SAMP-T. Ai pohoi se ishte “më mirë” sesa sistemi Patriot i prodhuar në SHBA që përdorej nga disa vende të BE-së.
