Shpenzimet e mbrojtjes janë “tashmë në rritje”, thotë shefi i NATO-s Mark Rutte, por ai shton se “ne duhet të bëjmë më shumë, shumë më tepër”.
“Është e qartë nga diskutimet tona sot se aleatët e njohin nevojën për të investuar shumë më tepër,” shton ai, raportojnë mediat e huaja.
Ai thotë se dy të tretat e aleatëve po shpenzojnë të paktën 2% të PBB-së së tyre për mbrojtjen, por shton se “ne duhet të bëjmë më shumë” dhe kjo duhet të jetë “më e shpejtë”.
“Ne duhet të kalojmë në një mentalitet të kohës së luftës dhe ne kemi nevojë që industria të zhvendoset te ne,” shton ai, shkruan A2 CNN.
Kujtojmë se Presidenti i SHBA-ve, Donald Trump, i ka ushtruar presion të vazhdueshëm shteteve aleate të NATO-s, në mënyrë që të rrisin shpenzimet e mbrojtjes.
Ndërsa ditët e fundit ai ka thënë se vendet e Europës duhet të shpenzojnë deri në 5 % të PBB-së së tyre për mbrojtjen, në mënyrë që të jenë të aftë të përballojnë agresionin nga jashtë.
