Koreografia e shfaqur dje nga tifozët e Manchester City-t para ndeshjes kundër Real Madridit ka shkaktuar shumë polemika.
Në tribunat e ‘Etihad Stadium’ u shfaq një imazh gjigant i Rodrit me Topin e Artë dhe mbishkrimi “Stop crying your heart out”, titulli i një kënge të njohur nga Oasis, që dukej sikur i drejtohej Vinicius Jr., i cili ende ndihej i zhgënjyer për mosfitimin e çmimit prestigjioz.
Megjithatë, grupi 1894 ka sqaruar se mesazhi nuk ishte për brazilianin, por për klubin madrilen, i cili vendosi të bojkotonte ceremoninë e ndarjes së çmimeve në shenjë proteste ndaj një vendimi të konsideruar të padrejtë:
“Asnjë nga mediet nuk e vuri re që personi i vënë në shënjestër nga pankarta as që ishte në fushë? Ishte Florentino Pérez ai që nisi një fushatë shpifjeje kundër Rodrit dhe që organizoi bojkotin e ceremonisë nga lojtarët e klubit të tij. Kjo duhej thënë, pavarësisht rezultatit të ndeshjes”, shkruhet në rrjetet sociale.
