Blutë kanë rrëshqitur në vend të 4-t pas tri barazimeve radhazi, por janë ende në kohë që të rifitojnë pozitat e mëparshme. Në kalendar janë dy ndeshje radhazi në “Elbasan Arena”, ku Dinamo do të presë së pari Vllazninë dhe javën e ardhshme Laçin.
Dhe nëse skuadra e Dajës rigjen formën e dhjetorit të kaluar, do ta përmirësonte jo pak pozicionin e saj në renditje. Një fitore e mundshme me Vllazninë do të thotë parakalim i kësaj të fundit, duke pasur parasysh që blutë kanë triumfuar në të dyja ndeshjet e mëparshme kundër shkodranëve dhe barazimi me pikë favorizon Dinamon.
Po ashtu, një fitore do të rriste edhe moralin te kryeqytetasit, të cilët do të shkonin më të karikuar pastaj për sfidën me Laçin. Këto 180 minuta në Elbasan, edhe pse më pas ka edhe shumë ndeshje të tjera, do të tregojnë jo pak se çfarë drejtimi do të marrë “nëndetësja”: do të sulmojë kreun apo do të mendojë thjesht për të qenë në “Final 4”.
