Tetë persona janë dënuar me burg, ndërsa ishin të akuzuar se qëndronin pas një rrjeti të trafikut të kokainës me vlerë 7 milionë paund në Wiltshire.
Hetimet e policisë zbuluan se ata kishin trafikuar të paktën 70 kg të lëndës narkotike nga viti 2016 deri në vitin 2020 me lidhje me një grup kriminal shqiptar.
BBC shkruan se kreu i grupit, Warren Allison, 36 vjeç u dënua me 23 vjet burg ndërsa vëllai i tij, Kelroy Allison, 41 vjeç u burgos për 16.5 vjet.
Policia shpjegoi se Warren Allison kishte blerë një Lamborghini me “fitimet e tij të paligjshme”.
Hetimet ekzaminuan mijëra dokumente, biseda telefonike dhe të dhëna të telekomit si dhe pamje të mbikëqyrjes. Banda, e drejtuar nga vëllezërit Allison, bleu drogë me shumicë dhe përdorte rrjete të koduara komunikimi për ta shpërndarë në sasi më të vogla.
Ata siguruan një automjet të modifikuar posaçërisht për këtë çështje dhe një shofer të besuar si Richard Cowell, 57 vjeç. Ai kishte krijuar një zonë të posaçme në makinë për të fshehur kokainën dhe paratë ndërsa përdorte një telefon me EncroChat për të folur me vëllezërit Allison. Duke pranuar se kishte bërë korrierin edhe për grupe të tjera kriminale, ai u burgos për 9 vjet.
Ndërsa e dashura e Warren Allison, Porcia Densley, 38 vjeç vepronte si një “menaxhere financash”, duke mbledhur dhe shpërndarë para sipas udhëzimeve të tij. Ajo u burgos për 8 vjet.
Policia sekuestroi një sasi droge në Bristol ku oficerët ndërhynë kur ajo po i dorëzohej kushëririt të Allisons, Anthony Burke. 34-vjeçari u burgos për 8 vjet.
Kokainën e furnizonin shqiptarët Ledian Hoxha dhe Pjetër Pisha. Ata tentuan të largohen nga Britania e Madhe për t’i shpëtuar arrestimit, por Hoxha, 38 vjeç, u burgos për 7 vjet e 4 muaj dhe Pisha, 37 vjeç u dënua me 6 vjet e 8 muaj. Ndërsa shqiptari Enid Aliko, 28 vjeç, u burgos për 4 vjet pasi kishte siguruar një pajisje të koduar dhe vepronte si kontakt për grupin e krimit shqiptar pas arrestimeve.
Gjatë gjyqit 12-javor, vëllezërit Allison dhe Cowell pretenduan se mesazhet u referoheshin rrobave false dhe jo drogës, por prokurorët sollën përgjime të shumta për të mbështetur akuzën.
