Ishulli i San Torinit në Greqi, i njohur ndryshe si ‘ishulli i Instagramit’ po përballet orët e fundit me një aktivitet të shtuar sizmik.
Gjatë katër ditëve të fundit, janë regjistruar më shumë se 200 tërmete mes Santorinit dhe Amorgos në Detin Egje, me më të fortin që ka arritur magnitudën 4.6.
Tërmetet, disa me magnitudë mbi 4, vazhduan të tronditin Santorinin edhe të hënën. Edhe pse këto tërmete merren si të lehta ose të dobëta, autoritetet mbyllën shkollat në Santorini, si dhe në Amorgos, Ios dhe Anafi. Njëkohësisht, këshilluan banorët të shmangin grumbullimet e mëdha në ambiente të mbyllura.
Aegean Airlines, kompania ajrore më e madhe greke, njoftoi dy fluturime shtesë të hënën dhe një të martën, që udhëtojnë për në dhe nga Santorini, për të ndihmuar banorët dhe vizitorët të largohen nga ishulli.
Ndërkohë kryeministri grek Mitsotakis komentoi situatën e fundit gjatë takimit të liderve të BE duke u bërë thirrje banorëve të ruajnë qetësinë.
“Kemi të bëjmë me një fenomen gjeologjik shumë të intensifikuar. Dëshiroj t’u bëj thirrje ishullarëve të ruajnë qetësinë,” tha Kryeministri grek Kyriakos Mitsotakis për gazetarët në Bruksel këtë të hënën.
Tërmeti i fundit i madh në Santorini ndodhi në vitin 1956. Tërmeti me magnitudë 7.5 u pasua nga një tsunami me lartësi 25 metra (rreth 80 këmbë). Të paktën 53 persona humbën jetën dhe më shumë se 100 u plagosën, ndërsa të paktën një e treta e shtëpive në ishull u shembën.
