Më 9 Janar të këtij viti emisioni “Stop” transmetoi denoncimin e zotit Ergin Isa, i cili u drejtua në redaksinë e “Stop” pasi ka një rrobaqepësi të vogël në qytetin e Durrësit dhe herë pas here lidhet me firma të mëdha, për të marrë punë.
Në muajin Prill firmosi një kontratë me firmën Do-Al shpk në Tiranë. Sipas marrëveshjes, Ergini do të qepte nëpërmjet rrobaqepësisë sasi të ndryshme rrobash dhe do të merrte një pagesë të caktuar. Bëri disa punë, si qepje xhupash dhe bluzash dhe iu tha se në fund do të merrte pagesën, por kjo nuk ndodhi.
Pagesa, që duhet të merrte ishte 2 milionë e gjysmë lekë të vjetra. Si pasojë, Ergini nuk ka paguar as punonjëset e rrobaqepësisë së tij dhe ato tashmë janë larguar. “Stop” shkoi pranë fasonerisë Do-Al Textil Shpk dhe veprimi i parë, që administratorja bëri ishte fshehja në zyrë. Ajo nuk pranoi të sqarojë problematikën, por thirri policinë për të bërë denoncim për hyrje pa leje në godinë edhe pse “Stop” kishte leje nga pronarët.
Pas këtij transmetimi, denoncime të tjera vërshuan në redaksinë e emisionit “Stop”. Armanda Gjata tregon se ka punuar pranë fasonerisë nga muaji Janar deri në muajin Gusht dhe më pas ka dhënë dorëheqjen, pasi kishin vonesë rrogash. Ajo thotë se ka një pagë të papaguar dhe 5 muaj pa sigurimet shoqërore.
“Kam punuar nga muaji Janar deri në muajin Gusht në tekstil. Në muajin Gusht jam shkëputur nga puna kam dhënë dorëheqjen, kishte 2 muaj që na vononte rrogat. Unë kam një muaj rrogë brenda që nuk ma ka dhënë fare. E kam kontaktuar që të më bëjë pagesën dhe asgjë, nuk pranon që ta paguajë. Ndërkohë nga Prilli deri në Gusht nuk më janë paguar siguracionet. Kam shkuar pranë inspektoratit dhe nuk më kanë dhënë asnjë zgjidhje. Ia kemi lënë në ngarkesë thonë, por asgjë”, tha Armanda Gjata.
Drande Dedaj thotë se ka punuar makiniste një vit dhe nuk iu ka dhënë pagesën që u jepej në dorë prej muajit Prill dhe ka 8 muaj të pasiguruar.
“Kam punuar në tekstil për një vit makiniste. Që na muaji Prill na kanë vonuar rrogat, pastaj në Nëntor mua më ka mbajtur lekët e dorës kurse Dhjetorin mua nuk ma ka dhënë fare. Mua m’i kanë kaluar në bankë të gjitha. 3 muajt e fundit m’i kanë kaluar 400-420 në bankë, të tjerat në dorë. Në dorë më takonte të merrja 120 dhe nuk m’i ka dhënë. Unë kam gati 500 mijë lekë pa marrë. Kam qenë e siguruar, por prej 8 muajsh jam pa sigurime. I ka deklaruar, por nuk i ka paguar”, tha Drande Dedaj.
Etleva Barçi dëshmon gjithashtu, se ka punuar si makiniste gati 3 vjet e gjysmë. Ka për të marrë paratë për 20 ditë punë dhe ka disa muaj boshllëqe në sigurimet shoqërore.
“Kam punuar për gati 3 vite e gjysmë. Ka për të më paguar një shumë prej 20 ditësh pune, ose bashkë me siguracionet dhe lejen që i binte të më paguante i bien të paktën 500 mijë lekë. Për arsye se ajo mbylli punën për 10 ditë dhe nuk na ktheu përgjigje. Në momentin që hapi punën unë nuk isha e gatshme për të shkuar në punë sepse kisha arsyet e mia dhe që nga ai moment ajo më ka hequr nga letrat në fillim të Korrikut. Problemet në këtë kompani kanë filluar që në Qershor. Qershorin që nuk i ka paguar pothuajse të gjithë punëtorët që kanë ikur nga puna. I kam kërkuar arsyen, i kam shkruar dhe më ka thënë do të t’i jap”, tha Etleva Barçi.
“Stop” u drejtua pranë Drejtorisë Rajonale të Inspektoratit të punës dhe Armando Loga, përgjegjësi i inspektimit tregon se çështja është dërguar për kompetencë pranë Drejtorisë së Tatimeve të Tiranës, për të vjelë detyrimet e subjektit.
“Subjekti Do-Al Textil Shpk është inspektuar shumë herë nga ne. Për herë të fundit është me ankesë nga punëmarrës të cilët kishin pagat pa marrë dhe sigurimet pa hedhur, kontributet shoqërore. Ne kemi marrë masë ndaj subjektit është sanksionuar për problemet që ka. Gjithashtu i kemi dërguar për kompetencë Drejtorisë Tatimore Rajonale Tiranë për mbledhjen e kontributeve me forcë pasi nuk e kemi ne eksesin për të mbledhur detyrimet me forcë. Por, i bëhet me dije kjo komptenecë institucionit që ka detyrimin ligjor për t’i mbledhur këto kontribute dhe ne herë pas here i kemi dërguar shkresë Drejtorisë Rajonale Tiranë për çdo rast dhe për çdo ankesë që na ka ardhur këtu, që nuk janë derdhur kontributet për sigurimet shëndetësore shoqërore. I vetmi institucion që mund ta urdhërojë subjektin dhe mund t’i thotë që të shlyejnë detyrimet është gjykata, nuk kemi dashur që të shkojë deri në gjykatë për të harxhuar kohë. Por, ka qenë e pamundur me ndërhyrjen tonë që subjekti të paguajë pagat e punëmarrësve dhe sigurimet e prapambetura”, tha Armando Loga.
Ndaj këtij subjekti është vendosur një gjobë dhe i është lënë detyrë, që të bëjë pagesat. Sipas tij gjykata është institucioni, që do të detyronte subjektin të shlyente detyrimet./tvklan
