Tirana po kalon një sezon mjaft të vështirë, teksa renditet në vendin e nëntë. Me objektivin e vetëm shpëtimin e sezonit, bardheblutë kanë rikthyer sërish në pankinë Bledi Shkëmbin.
Ish-trajneri dhe ish-lojtari i Tiranës, Erbim Fagu, në një intervistë ekskluzive për News 24 bëri analizën e tij për sezonin e kryeqytetasve.
Mëkatet, rreziku i rënies nga kategoria, apo trekëndëshi Shkëmbi-Magani-Shkëmbi, ishin disa nga çështjet e prekura nga trajneri.
Tirana pretendente për rënien nga kategoria- Unë kam deklaruar nga fillimi i sezonit se Tirana këtë vit e kishte vitin zero, pasi nisi gjithçka nga fillimi. Filloj gjithçka me lojtarë të ri, krijoi një ekip krejtësisht të ri. Kjo punë ka rrisk për vazhdimësinë e skuadrës.
Problemi është se Tirana është mësuar të jetë në majë të kampionatit, padyshim që për këtë duhen lojtarë me përvojë. Tirana u mundua të krijojë një ekip me lojtarë të ri dhe të etur, por jo çdo kush mund të luajë me Tiranën. Tirana ka patur përherë futbollistë me peshë.
Cfarë po shkon keq te Tirana? Nuk mund të them për gabim. Unë kam luajtur te Tirana dhe lojtar i ri kam qenë. Problemi është se sa arrijnë këta që të krijojnë impakt dhe sa arrijnë që të mbajnë presionin e tifozëve…
Shkarkimi dhe rikthimi i Bledi Shkëmbit- Kjo nuk është normale aspak, të paktën nga ana profesionale. Shkëmbi nuk duhej hequr, pavarësisht rezultateve që nuk ishin të duhura. Ai e njihte skuadrën. Në situatën që Tirana ndodhet, kjo ishte një zgjidhje e mirë, por sërish duhet të presim për të parë fundin.
Tirana bie nga kategoria? Sigurisht që ja kam frikën. Uroj që mos të bie nga kategoria, pasi nuk ja uroj kurrë Tiranës që të luajë një kategori më poshtë. Shpresoj që me Shkëmbin të lëvizin disa gjëra.
