Ky është momenti kur sapo është çarë diga e hidrocentralit Sasaj në Bunec të Lukovës. Në videon e mëposhtme shihet sasia e lartë e ujit që vërshon më pas mbi banesa dhe biznese.
Sipas Ministrisë së Mbrojtjes, ujësjellësi është çarë rreth orës 12:26 të ditës së djeshme dhe se në momentin e shembjes ka patur rreth 15.000 metra kub ujë.
Si pasojë e përmbytjes, ka prezencë uji dhe balte në 12 biznese në Bunec dhe është dëmtuar baza ushqimore e blektorisë ne 2 familje. Fatmirësisht nuk ka patur dëme në njerëz.
Sipas informacioneve nga banorët e zonës ka rikthim të energjisë elektrike në fshatrat Borsh, Piqeras, Lukovë, Bunec, Shën Vasil, Fterrë, Nivicë. Është larguar uji prej nën stacionit të Bunecit që furnizonte me energji këto fshatra teksa është ndalur dhe rrjedhja e ujit në digë.
Gjithashtu, Policia e Vlorës dhe Prokuroria kanë nisur hetimet për rastin në fjalë. Janë marrë të gjitha provat në vendngjarje që mund të çojnë në zbulimin e faktorëve përse çuan në çarjen e digës. Hetim ka nisur edhe nga prokuroria, teksa pritet që të merren në pyetje edhe përgjegjësit që realizuan projektin vite më parë.
Dy janë pistat kryesore përse mund të jetë çarë diga: punimet pa cilësi si dhe mbingarkesa me ujë mbi kapacitetin e saj, si rrjedhojë e prurjeve të larta.
