Gazetari Arjon Sulo është shprehur se SPAK ka ndikuar në zgjedhjet e 11 majit dhe ka ulur shanset për të ndodhur rotacioni politik në vend.
Komentet Sulo i bëri në A2 CNN, ku shprehu bindjen se PS dhe Edi Rama do i fitojnë zgjedhjet dhe sipas tij, kjo do të vijë edhe falë SPAK-ut.
Për të ilustruar vendimet sipas tij politike të SPAK, Sulo mori rastin e thirrjes në SPAK të kryebashkiakut të Tiranës, Erion Veliaj. Ai tha se paralelisht me të u thirr edhe denoncuesi i Veliajt, Belind Këlliçi, me qëllim që të ‘sfumohej’ çështja e Veliajt dhe të mbyllej pa të dosja 5D.
“Nëse bëhet tani zgjatja e mandatit të SPAK, është provë për PS. Unë them do e shtyjnë. Aty deputetët ngrenë dorën, Rama do fitojë, e ka shumë të thjeshtë vendimin. PS i fiton zgjedhjet. Deri tani SPAK ka ndikuar në zgjedhje dhe janë ulur shanset për rotacionin politik.
Ne kemi një fotografi, ditën që Veliaj u pyet në SPAK për 5 orë, SPAK mori Belind Këlliçin e pyeste për diplomën dhe mbylli 5 D. Kallëzuesin e Veliajt e thirri që ta shikonte mileti që të thoshin ja të dy, një nga PS e një nga PD dhe shkoi e mbylli dosjen 5 D. Në mënyrë tinëzare, më e pakëta, pse? Pa Veliajn 5 D. Më politikë se kaq nuk kisha parë”, tha Sulo.
