Një masakër mjedisore është denoncuar nga disa banorë që jetojnë pranë Liqenit të Farkës në Tiranë.
Sipas banorëve, firma “Al Point”, me pronar Aleksandër Vasili, i cili është dhëndri i Kujtim Qefaliajt, vëllait të deputetit Xhemal Qefaliajt, po punon për ndërtimin e një kompleksi vilash pranë liqenit, duke shkatërruar rrugë kryesore, teksa aty ndodhen edhe shumë banesa.
Për Fax News, banorët kanë shprehur shqetësimin dhe revoltën e tyre lidhur me situatën. Një nga banorët e Farkës, tha se banesa e tij ndodhet pranë rrugës së shembur. Ai tregoi se firma “Al Point” u kishte garantuar siguri gjatë kryerjes së punimeve dhe se nuk do të kishte probleme, por realiteti ka qenë ndryshe.
Gjithashtu, banori pretendon se ka lajmpëruar Policia, por këta të fundit kishin frikë prej tij dhe e kishin tmerr sapo ia u përmendje emrin.
“Pronari i Firmës është dhënri i Qefalive. E kam kontaktuar, i kam thënë po na bën dëm të madh, po na shkatërron shtëpinë se unë e shikoja si punonjës, sepse jam ndërtues vetë. Ai mori dhe shkatërroi gjithë dynjanë këtu që siç e shikoni dhe iku. Erdhi Policia, por Policia sa e dëgjonte dhëndri i Qefalive, e kishte frikë.
Ai na tha mos u mërzisni do ta rregulloj unë dhe iku fare. Tha ndryshe unë vete në burg, po mua nuk më duhet burgu i atij, por fëmijët e mi dhe shtëpia ime. Ai na ka shkatërruar këtu. Mirë ne jemi burra, por kemi familje, kemi fëmijë dhe këtu është e rrezikshme se do bjenë dhe shira është dimër. Do ve pilotat thoshte do bëj atë apo këtë dhe s’bëri gjë fare. Ai s’ka asnjë projekt dhe asgjë në dorë se unë e kam parë. Është pa leje dhe i paligjshëm. Ka ardhur ka punuar natën dhe na ka shkatërruar.
Nga institucionet apo njësia Dajt nuk ka ardhur asnjë njeri këtu, atë e kanë tmerr, nuk i zenë dot emrin me gojë. Pse e kanë frikë nuk e di. Ne nuk bëjmë dot një kovë llaç ta hedhim aty se të vjen Policia menjëherë, atë vinte Policia këtu dhe e kishte tmerr t’i afroheshin” – shprehet banori.
Meush Skeja, një tjetër banor, ishte ai që bëri denoncimin në polici pas shembjes së avllisë së tij, gjë që përkohësisht ndaloi punimet. Megjithatë, 2-3 ditë më vonë punimet rifilluan dhe gërryerjet vazhduan, duke vënë në rrezik avllinë dhe shtëpinë e tij.
“Ne nuk jemi kundër punimeve, por duam sigurinë e jetës sonë dhe të familjeve tona. Populli nuk duhet të pësojë dëme. Nuk e dimë saktësisht çfarë do të ndërtojnë, por nuk duam që kjo të na shkaktojë pasoja të rënda. Dëmi që na është bërë tani kërkojmë të kompensohet, dhe firma duhet të japë llogari. Nuk dimë nëse këto punime janë bërë sipas rregullave apo në rrugë të tjera. Thirrja jonë është që të punojnë me ndershmëri dhe sipas ligjit. Gabimet që bëjnë duhet të kontrollohen nga qeveria,” u shpreh Skeja.
Banorët kërkojnë ndërhyrje urgjente për të parandaluar pasojat e mëtejshme dhe për të siguruar që ndërtimet pranë liqenit të kryhen me transparencë dhe sipas rregullave mjedisore.
