Forcat “Shqiponja” të Policisë së Tiranës kanë arrestuar një të ri, me rekorde të mëparshme kriminale dhe rrezikshmëri të lartë shoqërore, i cili qarkullonte me armë zjarri me vete.
Në pranga është vënë shtetasi Arli Ndrejaj, 33 vjeç, banues në Tiranë, me precedent të mëparshëm në fushen e krimeve ndaj personit.
“Në rrugën “Sali Butka”, shërbimet e Forcës së Posaçme “Shqiponja” kanë ndaluar automjetin me drejtues shtetasin Arli Ndrejaj, dhe gjatë kontrollit të çantës së supit, kanë gjetur dhe sekuestruar në cilësinë e provës materiale, një armë zjarri pistoletë me krëhër e municion luftarak.” – thuhet në njoftimin e Policisë.
Materialet proceduriale i kaluan Prokurorisë së Tiranës, për veprime të metejshme.
Arli Ndrejaj është arrestuar edhe në vitin 2014 bashkë me 6 persona të tjerë, të kapur në aksin rrugor Lezhë – Kurbin, duke tentuar të vrasin me armë zjarri shtetasin Roan.P, me banim në Pllanë-Lezhë. Nga hetimet e policisë në atë kohë, 7 të arrestuarit për një periudhë 2 javore në Tiranë dhe në Lezhë, studionin lëvizjet e Roan.P, me synimin e vrasjes, për motive të dobëta.
