Igli Tare, i cili është në pritje për t’u rikthyer në arenën e futbollit si drejtor sportiv, ka dhënë një intervistë për “Gazzetta dello Sport”, ku ka folur rreth merkatos së ardhshme të janarit dhe disa nga ish-kolegët e tij.
Mbi merkaton e dimrit: “Goditjet e mëdha në merkaton e dimrit nuk ndodhin shpesh. Në këtë periudhë bëhen lëvizje kryesisht për të mbushur boshllëqet e skuadrave”.
Tare komentoi edhe situatën e mbrojtësit sllovak, Milan Skriniar: “Duke mos luajtur rregullisht, mendoj se është në kërkim të një skuadre, ku mund të gjejë më shumë hapësira. Skriniar nuk ka nevojë për prezantim, të gjithë e dinë se kush është ai”.
Kur u pyet nëse Interi ka nevojë për përforcime për të fituar kampionatin, Tare u përgjigj me siguri: “Sipas mendimit tim, Interi është favorit edhe me gjendjen aktuale. Ka skuadrën më të fortë në Serie A, pastaj Simone Inzaghi është një nga trajnerët më të mirë në botë”.
Tare ka shprehur gjithmonë vlerësim për ish-shokun e tij të skuadrës, duke evidentuar stilin dhe aftësitë e tij si trajner.
